O‘zbekiston 22-dekabr kuni Afg‘onistonga to‘qqizta maxsus yuk mashinasiga ortilgan insonparvarlik yordamini jo‘natgandi. Insonparvarlik yordamini topshirish marosimida Balx viloyati gubernatori Mullo Muhammad Dovud Muzammil bu yordam uchun O‘zbekistonga minnatdorchilik bildirdi.
“O‘zbek xalqi Afg‘onistonda tinchlik va barqarorlikni o‘rnatish, aholisining mushkulini oson qilishdek xayrli ishlarda bosh bo‘layotganidan biz afg‘on xalqi juda ham minnatdormiz.
Bugun O‘zbekiston hukumati mintaqadagi muammolar yechimi va davlatlar o‘rtasidagi hamkorlikni yo‘lga qo‘yish bo‘yicha o‘z tashabbus va amaliy harakatlarini olib bormoqda. Birgina Mozori Sharif—Kobul—Peshovar temir yo‘li qurilishini oladigan bo‘lsak, bu loyiha nafaqat uchta davlat, qolaversa Markaziy Osiyo mamlakatlarining iqtisodiyotida juda katta ahamiyat kasb etadi.
Mana bunday beg‘araz ko‘mak xalqlarimizni jipslashtirib o‘zaro bordi-keldi munosabatlarimzni yanada mustahkamlaydi. Bundan esa albatta afg‘on xalq manfaatdor. Yana bir bor samimiy tashakkurimni izhor etaman”, — degan u “O‘zbekiston24” telekanaliga bergan intervyusida.
Qayd etilishicha, insonparvarlik yuki 48 tonna un, 30 tonna shakar, 48 tonna bug‘doy, 15 tonna o‘simlik yog‘i, 10 ming dona konservalangan go‘sht mahsulotlari , 22 tonna makaron, 1000 juft erkaklar va bolalar ust kiyimi, 1000 juft bolalar, erkaklar va ayollar oyoq kiyimidan tashkil topgan.
O‘zbekiston prezidentining Afg‘oniston bo‘yicha maxsus vakili Ismatulla Irgashev Afg‘onistonga yetkazib berilgan ushbu insonparvarlik yordami haqida fikr bildirgan.
“Qish qattiq kelganini hisobga olgan holda, O‘zbekiston rahbariyatining dasturiga binoan, Afg‘oniston xalqiga bu yilning o‘zida yettinchi marotaba insonparvarlik yordamini olib keldik. Balx viloyati gubernatori Muhammad Dovud Muzammil bilan bo‘lgan suhbatda “O‘zbekiston va Afg‘oniston o‘rtasidagi chegara — do‘stlik chegarasi. Bu chegarada O‘zbekiston tomondan biz faqat fayz va baraka ko‘rib kelyapmiz. Bugungi kunda bizga eng yaqin bo‘lgan, birodarlik munosabatlarini ko‘rsatayotgan davlat ham shu. Biz O‘zbekiston bilan har tomonlama munosabatlarni kengaytirishga, mustahkamlashga va har qanday masalani do‘stona hal qilishga harakat qilamiz, deb aytib o‘tdi”, — degan Ismatulla Irgashev.
Mavzuga doir: Afg‘onistonda O‘zbekiston tomonidan yuborilgan insonparvarlik yordamini topshirish marosimi bo‘lib o‘tdi (foto)
Izoh (0)