Саида Мирзиёеванинг ўқитувчиларни ўз фаолиятига бевосита алоқадор бўлмаган ишдан бутунлай озод қилиш ташаббуси турли мамлакатларда сиёсатчилар, журналистлар ва жамоат арбоблари томонидан муҳокама қилинмоқда. Бу борада Қозоғистоннинг энг йирик — «Amanat» сиёсий партияси аъзоси, Чимкент шаҳри маслаҳатининг VII чақириқ депутати Мурат Жолдихожаев ҳам ўз фикрларини билдирди.
«Эътиборимни Ўзбекистонда ҳам, хорижда ҳам кенг муҳокама қилинган, Саида Мирзиёеванинг ўқитувчиларни ҳимоя қилган ва ҳатто ўқитувчиларни вазифасидан ташқари ишларга жалб қилганлар учун маъмурий, эҳтимолки, жиноий жавобгарликка тортиш жорий этилиши ҳақидаги нутқи ўзига тортди.
Бу Ўзбекистон ушбу муаммо борлигини тан олиб, уни бартараф этишга киришгани, таълим даражаси ва сифатини ошириш нияти қанчалик жиддий эканидан далолат беради. Шавкат Мирзиёев ҳам Олий Мажлисга мурожаатномасида бу масалага катта эътибор қаратганини барчамиз кўрдик.
Президент келгуси йилни ‘Инсонга эътибор ва сифатли таълим йили’ деб номлашни таклиф қилди ва бу бевосита ўқитувчиларнинг мавқеи, уларнинг шаъни ва қадр-қимматини ҳимоя қилиш билан боғлиқ», — деб ёзди Жолдихожаев ўзининг Facebookдаги саҳифасида.
Шунингдек, депутат Қозоғистон ҳам шундай муаммоларга дуч келгани, бунинг натижасида 2019 йилда «Ўқитувчи мақоми тўғрисида»ги қонун қабул қилингани ва бу амалда ўзини етарли даражада оқлаганини қайд этди. Бу тажриба Ўзбекистон учун ҳам фойдали бўлиши мумкинлиги таъкидланди.
Мавзуга доир:
Изоҳ (0)