Toshkent shahri Yunusobod tumanidagi Alisher Navoiy nomli kutubxona maydoniga Yangi yil bosh archasini o‘rnatish tadbirlari uchun davlat budjetidan 1 mlrd 592 mln 858 ming so‘m sarflandi. Bu haqdagi ma’lumotlar (№ 35, № 36) Davlat xaridlari elektron portaliga joylangan.
Portalda 20-dekabrda davlat buyurtmachisi Toshkent shahar madaniyat bosh boshqarmasi va yetkazib beruvchi “Media Globe” MCHJ o‘rtasida bayram archasini o‘rnatish tadbirlari uchun ikkita shartnoma tuzilgani ko‘rsatilgan.
Shartnomalar tuzishda hech qanday tender o‘tkazilmagan va xaridlar to‘g‘ridan to‘g‘ri amalga oshirilgan.
Portalda joriy yil davomida Toshkent shahar madaniyat bosh boshqarmasi va “Media Globe” MCHJ o‘rtasida jami 7 ta shartnoma tuzilgani ko‘rsatilgan.
Xususan, may va iyun oylarida Tashkent flower festival uchun davlat budjeti hisobidan 1 mlrd 540 mln so‘mlik (№17 va №18) ikkita, iyundagi Opera festivali uchun jami (№16, №19 №20) 2 mlrd 700 mln so‘mlik uchta tendersiz shartnomalar tuzilgan.
Saytda ko‘rsatilgan Toshkent shahar madaniyat bosh boshqarmasi bilan “Media Globe” MCHJ o‘rtasidagi shartnomalarning umumiy qiymati 5 mlrd 834 mln so‘mni tashkil etgan.
“Orginfo.uz” saytida buyurtmalarni tendersiz olgan “Media Globe” MCHJning 100 foizlik ulushi Jahongir Zufarovga tegishli ekani, kompaniya 2021-yil 1-yanvarda tashkil etilgani ko‘rsatilgan.
Izoh (0)