Ukraina prezidenti Vladimir Zelenskiy rasmiy tashrif bilan Vashingtonga keldi. Bu haqda prezident o‘zining Telegram kanalida xabar berdi.
Zelenskiy dastlab Polshaning Jejuv shahrigacha poyezdda borgan va u yerdan aeroportda AQSHga uchib ketgan. Ukraina prezidentining safariga Amerika harbiy samolyoti jalb qilingan. Samolyot bortida Zelenskiy bo‘lganmi yoki Ukraina rahbari samolyotiga hamrohlik qilganmi, hozircha noma’lum.
Zelenskiy Vashingtonga tashrifi davomida AQSH prezidenti Jo Bayden bilan muzokaralar o‘tkazadi va Kongressda nutq so‘zlaydi. Amerika yetakchisi va Zelenskiy Toshkent vaqti bilan soat 00:00 da Oq uyda uchrashishi kutilmoqda.
“Men bugun Vashingtondaman, Amerika xalqiga, prezidentga va Kongressga ko‘rsatgan yordami uchun minnatdorlik bildiraman. Shuningdek, g‘alabamizni yaqinlashtirish uchun hamkorlikni davom ettiramiz. Ukrainaning chidamliligi va mudofaa qobiliyatini mustahkamlash bo‘yicha qator muzokaralar o‘tkazaman. Xususan, Prezident Jozef Bayden bilan Ukraina hamda AQSH o‘rtasidagi ikki tomonlama hamkorlikni muhokama qilamiz. Kelgusi yil biz butun yurtimizga, xalqimizga Ukraina bayrog‘i va erkinligini qaytarishimiz kerak”, — deya Zelenskiy tashrifga izoh berdi.
Kreml matbuot kotibi Dmitriy Peskov Zelenskiyning AQSHga tashrifi yaxshilikka olib kelmasligini aytgandi.
“Qurol yetkazib berish davom etmoqda, yetkazib beriladigan qurol-yarog‘ ko‘lami kengaymoqda. Bularning barchasi, albatta, mojaroning kuchayishiga olib keladi va aslida Ukraina uchun yaxshilik olib kelmaydi”, — degan u.
Politico nashri Ukraina delegatsiyasi 21-dekabr kuni bo‘lib o‘tadigan tashrif davomida AQSHdan ATACMS va Grey Eagle ta’minotini so‘rashini xabar qilgan. Biroq ayni paytda AQSH rasmiylari Ukrainani bunday qurol-yarog‘ bilan ta’minlashga rozi emas.
“Bayden Oq uyi ATACMS yuborishni qat‘iyan rad etdi. Xarajatlar katta”, — degan AQSH rasmiylari.
Bayden ma’muriyatining fikricha, Kiyevga uzoq masofali raketalarni yuborish Putinni yanada halokatli qurollardan foydalanishga undashi mumkin.
Izoh (0)