Оқ уйда АҚШ ва Украина президентлари Жо Байден ва Владимир Зеленский ўртасида музокаралар бўлиб ўтди, деб ёзади CNN.
Учрашувнинг очиқ қисмида Байден Украинадаги уруш 300 кундан ортиқ давом этаётганини таъкидлади. У Вашингтон ва Киевнинг Россия тажовузига қарши биргаликдаги курашини шараф деб ҳисоблайди.
«Путин олиб бораётган бу шафқатсиз урушга қарши бизнинг биргаликдаги курашимизда сиз билан ёнма-ён туриш мен учун катта шараф», — деди АҚШ президенти.
Байден Россия томонидан Украина муҳим инфратузилмасининг ўққа тутилишини қоралади ва Путин «қишдан қурол сифатида фойдаланишга уринаётгани»ни айтди. Шунингдек, у америкаликлар европалик иттифоқдошлари билан биргаликдаКиевни қўллаб-қувватлашига ишонтирди.
Ўз навбатида, Зеленский Украинага берилаётган ёрдам учун АҚШ халқи ва ҳукуматига миннатдорлик билдирди. Унинг қўшимча қилишича, Оқ уйда бўлиш — у учун «катта шараф».
«Таклифингиз учун раҳмат. Мен ҳақиқатан ҳам аввалроқ келмоқчи эдим, президент Байден буни билади, лекин имконим бўлмади, чунки вазият мураккаб эди. Энди келибман, демак, биз вазиятни назорат қиляпмиз, бу эса биринчи навбатда — сизнинг кўмагингиз шарофати билан», — деди Украина етакчиси.
Учрашув чоғида Зеленский совға сифатида Байденга Бахмут остоналарида жанг олиб бораётган HIMARS батареяси командирининг Жанговар хизматлар орденини топширди. Унинг сўзларига кўра, Павло исмли ҳарбий хизматчи мукофотни АҚШ президентига беришни сўраган. «Бунга лойиқ эмасман, лекин жуда қадрлайман», — деди бунга жавобан Байден.
Владимир Зеленский 21 декабрь куни эълон қилинмаган ташриф билан Вашингтонга келди. Ташриф доирасида Америка етакчиси билан музокаралар ўтказди, шунингдек, АҚШ Конгрессида нутқ сўзлади.
Изоҳ (0)