Ukraina prezidenti Vladimir Zelenskiy 21-dekabr kuni AQSH prezidenti Jo Bayden bilan uchrashish uchun Vashingtonga uchib ketgan. Bu haqda CNN manbalariga tayanib xabar bermoqda.
“Zelenskiy allaqachon Vashingtonga qarab yo‘lga chiqqan”, — deyiladi xabarda.
CNN ma’lumotlariga ko‘ra, Zelenskiy Patriot raketa tizimlarini o‘z ichiga oladigan harbiy yordamning yangi paketini muhokama qilish uchun Bayden bilan ko‘rishishni rejalashtirmoqda. Vashingtonga tashrif chog‘ida u Kongressga ham murojaat qilishi mumkin.
Avvalroq Oq uy Zelenskiyning potensial tashrifi haqidagi ma’lumot yuzasidan izoh berishdan bosh tortgan edi.
AQSH Vakillar palatasi spikeri Nensi Pelosi Ukraina prezidenti 21-dekabr kuni Kapitoliyga kelishi haqidagi xabarlarni tasdiqlamagandi.
“Hozircha bilmaymiz. Shunchaki xabarimiz yo‘q”, — dedi u. CNN’ning u taklif qilingan-qilinmagani haqidagi savoliga: “Yo‘q. U kelishiga ishonchimiz komil bo‘lmagani uchun, yo‘q”, — deya javob bergandi.
Zelenskiy 18-dekabr kuni Bayden bilan Kiyevga Patriot zenit-raketa majmualarini yetkazib berish haqidagi muzokaralar ijobiy natijaga qarab siljiyotganini aytgandi. “Men bu masalaga pozitiv bilan qarayman. Katta pozitiv bilan”, — degandi u.
Ukraina prezidenti “jarayon borayotgani”ni va yetkazib berish masalasi bilan shaxsan o‘zi shug‘ullanayotganini qo‘shib qo‘ygandi.
Kiyev AQSH va ittifoqdoshlaridan havo hujumiga qarshi mudofaaning universal vositasi sifatida foydalaniladigan Patriot zenit-raketa majmualarini yetkazib berishni bir necha marta so‘ragan. Ukraina tashqi ishlar vaziri Dmitriy Kuleba ushbu tizimlar Ukrainaning muhim infratuzilmasini himoya qila olishini aytgandi.
Avvalroq CNN AQSH prezidenti Jo Bayden ma’muriyati Ukrainaga Patriot zenit-raketa majmualarini yuborishga tayyorgarlik jarayonini yakunlayotgani haqida xabar bergandi.
Patriot zenit-raketa majmuasi yuborilishini Pentagon rahbari Lloyd Ostin ma’qullashi kerak, shundan keyin esa qaror Bayden tomonidan tasdiqlanadi.
“Albatta, Patriot komplekslari Rossiya qurolli kuchlarining qonuniy nishoniga aylanadi. Lekin hozir bunga izoh bermagan bo‘lardim, sababi zenit-raketa majmualarini Ukrainaga yetkazib berilishi haqidagi xabarlar OAV da tarqalmoqda. Bu narsa ishonchsiz, shuning uchun rasmiy ma’lumotni kutamiz”, — degan edi Kreml matbuot kotibi Dmitriy Peskov bu xabarga javoban.
Izoh (0)