AQSH prezidenti Jo Bayden ma’muriyati Ukrainaga Patriot zenit-raketa majmualarini yuborishga tayyorgarlik jarayonini yakunlamoqda, ushbu majmua jo‘natilishi haqida shu hafta e’lon qilinishi mumkin, deb xabar beradi CNN o‘z manbalariga tayanib. Noyabr oxirida Pentagon Ukrainaga bu tizimlarni yetkazib berishni rejalashtirmayotganini ma’lum qilgandi.
Patriot zenit-raketa majmuasi yuborilishini Pentagon rahbari Lloyd Ostin ma’qullashi kerak, shundan keyin esa qaror Bayden tomonidan tasdiqlanadi. Telekanal manbalariga ko‘ra, ayni paytda qarorning mudofaa vaziri tomonidan ma’qullanishi kutilmoqda.
Kiyev G‘arb mamlakatlaridan Patriot majmuasini yetkazib berishni ko‘p marta so‘ragan, uni AQSH va ittifoqdoshlari havo hujumiga qarshi mudofaaning universal vositasi sifatida qo‘llaydi. Ukraina tashqi ishalr vaziri Dmitriy Kuleba bu tizimlar Ukraina muhim infratuzilmasini himoya qila olishini aytgandi.
CNN qayd etishicha, nechta pusk qurilmasi yetkazib berilishi hozircha noma’lum. Oddiy Patriot batareyasi tarkibiga nishonlarni aniqlaydigan va kuzatadigan radar, kompyuterlar, energetika uskunasi, boshqaruv stansiyasi va sakkiztagacha pusk qurilmasi kiradi, ularda esa uchirishga tayyor to‘rtta raketa bo‘ladi.
Patriot zenit-raketa majmuasini yuborishga kelishib olingan taqdirda, ular eng qisqa muddatda yetkazib beriladi, ukrainaliklar esa AQSHning Germaniyadagi bazasida (Grafenvyordagi) ulardan foydalanishga o‘rgatiladi.
Majmualarni yetkazib berish va ishlatish bilan bog‘liq muammolar “ulkan”, deydi telekanal. Patriot raketa batareyalarini tayyorlash uchun odatda bir necha oy ketadi, ularni boshqarish uchun esa o‘nlab odam kerak bo‘ladi, deyiladi maqolada. Amerika ma’muriyati vakili aytib berishicha, so‘nggi vaqtlarda yuzaga kelgan vaziyat Oq uyni Ukrainaga Patriot tizimini yuborish haqida qaror qabul qilishga undagan.
So‘nggi yillarda AQSH Patriot’larni “Eron va uning gumashtalari tomonidan xavflarga qarshi turish” uchun Saudiya Arabistoni va Iroqqa, shuningdek, Shimoliy Koreyani tiyib turish uchun Tinch okeani mintaqasiga yetkazib bergan edi. Hammasi bo‘lib ushbu tizimni AQSHning o‘ndan ortiq ittifoqchilari, shu jumladan, Germaniya, Yaponiya va Isroil ham sotib olgan.
Izoh (0)