Украина президенти Владимир Зеленский 21 декабрь куни АҚШ президенти Жо Байден билан учрашиш учун Вашингтонга учиб кетган. Бу ҳақда CNN манбаларига таяниб хабар бермоқда.
«Зеленский аллақачон Вашингтонга қараб йўлга чиққан», — дейилади хабарда.
CNN маълумотларига кўра, Зеленский Patriot ракета тизимларини ўз ичига оладиган ҳарбий ёрдамнинг янги пакетини муҳокама қилиш учун Байден билан кўришишни режалаштирмоқда. Вашингтонга ташриф чоғида у Конгрессга ҳам мурожаат қилиши мумкин.
Аввалроқ Оқ уй Зеленскийнинг потенциал ташрифи ҳақидаги маълумот юзасидан изоҳ беришдан бош тортган эди.
АҚШ Вакиллар палатаси спикери Нэнси Пелоси Украина президенти 21 декабрь куни Капитолийга келиши ҳақидаги хабарларни тасдиқламаганди.
«Ҳозирча билмаймиз. Шунчаки хабаримиз йўқ», — деди у. CNN’нинг у таклиф қилинган-қилинмагани ҳақидаги саволига: «Йўқ. У келишига ишончимиз комил бўлмагани учун, йўқ», — дея жавоб берганди.
Зеленский 18 декабрь куни Байден билан Киевга Patriot зенит-ракета мажмуаларини етказиб бериш ҳақидаги музокаралар ижобий натижага қараб силжиётганини айтганди. «Мен бу масалага позитив билан қарайман. Катта позитив билан», — деганди у.
Украина президенти «жараён бораётгани»ни ва етказиб бериш масаласи билан шахсан ўзи шуғулланаётганини қўшиб қўйганди.
Киев АҚШ ва иттифоқдошларидан ҳаво ҳужумига қарши мудофаанинг универсал воситаси сифатида фойдаланиладиган Patriot зенит-ракета мажмуаларини етказиб беришни бир неча марта сўраган. Украина ташқи ишлар вазири Дмитрий Кулеба ушбу тизимлар Украинанинг муҳим инфратузилмасини ҳимоя қила олишини айтганди.
Аввалроқ CNN АҚШ президенти Жо Байден маъмурияти Украинага Patriot зенит-ракета мажмуаларини юборишга тайёргарлик жараёнини якунлаётгани ҳақида хабар берганди.
Patriot зенит-ракета мажмуаси юборилишини Пентагон раҳбари Ллойд Остин маъқуллаши керак, шундан кейин эса қарор Байден томонидан тасдиқланади.
«Албатта, Patriot комплекслари Россия қуролли кучларининг қонуний нишонига айланади. Лекин ҳозир бунга изоҳ бермаган бўлардим, сабаби зенит-ракета мажмуаларини Украинага етказиб берилиши ҳақидаги хабарлар ОАВ да тарқалмоқда. Бу нарса ишончсиз, шунинг учун расмий маълумотни кутамиз», — деган эди Кремль матбуот котиби Дмитрий Песков бу хабарга жавобан.
Изоҳ (0)