Кремль Украина президенти Владимир Зеленскийнинг Вашингтонга ташрифидан кейин ижобий ўзгаришлар бўлишини кутмаяпти. Бу ҳақда Россия президенти матбуот котиби Дмитрий Песковга таяниб, «Ведемости» хабар берди.
«Қурол етказиб бериш давом этмоқда, етказиб бериладиган қурол-яроғ кўлами кенгаймоқда. Буларнинг барчаси, албатта, можаронинг кучайишига олиб келади ва аслида Украина учун яхшилик олиб келмайди», — деди у.
Украина президенти девони Владимир Зеленскийнинг АҚШга расмий ташрифини тасдиқлаган. Байден билан учрашув чоғида давлат раҳбарлари фронтдаги кейинги ҳаракатлар, украиналик аскарларни тайёрлаш имконияти, Россияга қарши санкциялар ва экспорт назорати, иқтисодиёт ва энергетика соҳаларида ёрдам, шунингдек, гуманитар ёрдам масалаларини муҳокама қилади.
Зеленскийнинг ўзи ҳам АҚШга ташрифини расман тасдиқлади. У сафардан мақсад — Украинанинг барқарорлигини ва мудофаа қобилиятини мустаҳкамлашдан иборат эканини ёзган. Politico нашри Украина делегацияси 21 декабрь куни бўлиб ўтадиган ташриф давомида АҚШдан ATACMS ва Грэй Eagle таъминотини сўрашини хабар қилган.
Бироқ айни пайтда АҚШ расмийлари Украинани бундай қурол-яроғ билан таъминлашга рози эмас.
«Байден Оқ уйи ATACMS юборишни қатъиян рад этди. Харажатлар катта», — деган АҚШ расмийлари.
Байден маъмуриятининг фикрича, Киевга узоқ масофали ракеталарни юбориш Путинни янада ҳалокатли қуроллардан фойдаланишга ундаши мумкин.
Изоҳ (0)