The Wall Street Journal gazetasi 16-dekabr kuni maqola chiqardi, unda Ukraina maxsus xizmatlariga tayanib, Rossiya prezidenti Vladimir Putin Checheniston rahbari Ramzan Qodirovga Kiyevda hukumat binolari joylashgan dahani egallab olib, Ukraina prezidenti Vladimir Zelenskiyni o‘ldirishni buyurgani haqida yozdi. Rossiya prezidenti matbuot kotibi Dmitriy Peskov ushbu ma’lumotlarni safsata deb atadi.
“Bu mutlaqo safsata”, — deya Peskov bu xabarga izoh berdi. WSJ’ga bergan intervyusida matbuot kotibi Vladimir Zelenskiyga nisbatan “buyurtma”ni “butunlay bema’ni, asossiz va yolg‘on gap” deb atadi. Ramzan Qodirovning apparatida ushbu xabar yuzasidan izoh berilganicha yo‘q.
25-fevral kuni, Ukrainada jangovar harakatlar boshlanganidan keyin bir kun o‘tib, Vladimir Zelenskiy Rossiya unga nisbatan suiqasd tayyorlayotganini va uni “birinchi raqamli nishon” deb hisoblashini aytgandi. O‘sha kuniyoq Dmitriy Peskov Rossiya Vladimir Zelenskiyni Ukraina prezidenti deb tan olishini ma’lum qildi.
Izoh (0)