Toshkentda qizlarni Turkiyaga fohishalikka yuborish bilan shug‘ullangan ikki ayolga jazo tayinlandi. Bu haqda DXX matbuot xizmati xabar berdi.
Ma’lum qilinishicha, viloyatning O‘rtachirchiq tumanida yashovchi, ayol M.R. (1999-yilda tug‘ilgan) hamda Nurafshon shahrida istiqomat qiluvchi ayol. Q.A. (2000-yilda tug‘ilgan) o‘zaro til biriktirib, qizlarni Turkiyaga fohishalik bilan shug‘ullanish uchun yuborib kelgan. Turkiyada yashovchi yana bir ayol esa qizlarga aviachipta sotib olish, ularni kutib olish hamda fohishalik bilan shug‘ullantirish ishlariga mas’ul bo‘lgan.
Jumladan, 2022-yilning aprel oyi boshlarida M.R. va Q.A. Toshkent shahrida yashovchi A.A.ni (1992-yilda tug‘ilgan) Turkiyaga borib, fohishalik bilan shug‘ullanish orqali har oyda 2 ming dollar ishlab topishga qiziqtirgan hamda dastlabki “daromadi”ning teng yarmini ularga berishi kerakligini tushuntirgan.
O‘z navbatida Turkiyada yashovchi ayol esa A.A.ga xorijga chiqish pasporti olishi uchun 50 dollar va Toshkent—Istanbul—Anqara yo‘nalishi bo‘yicha aviachipta yuborgan.
DXX xodimlari tomonidan IIV hamkorligida o‘tkazilgan tezkor tadbirda M.R. qizni Toshkent xalqaro aeroportiga olib kelib, Turkiyaga yubormoqchi bo‘lgan vaqtida qo‘lga olingan. Tezkor-qidiruv tadbirlari jarayonida uning sherigi Q.A. ham ushlangan.
Ularga nisbatan Jinoyat kodeksining 135-moddasi bilan jinoyat ishi qo‘zg‘atilib, tergov harakatlari olib borilgan va 2022-yilning avgustida jinoyat ishlari bo‘yicha Mirobod tuman sudi tomonidan M.R.ga nisbatan 3 yil va Q.A.ga nisbatan esa 5 yil muddatga ozodlikdan mahrum qilish jazosi tayinlangan.
Lekin Q.A.ning oilaviy sharoiti, ikki nafar voyaga yetmagan farzandlari borligi inobatga olinib, Jinoyat kodeksining 72-moddasi qo‘llanilib, tayinlangan ozodlikdan mahrum qilish jazosi shartli hisoblanib, 2 yil sinov muddati belgilangan.
Mavzuga doir: Toshkentda chet el fuqarosi bilan kelishib, yosh qizlarni Turkiyaga fohishalik uchun sotib yuborayotgan ayol ushlandi
Izoh (0)