Тошкент вилоятида одам савдоси билан шуғулланаётган эр-хотин фаолиятига чек қўйилди. Бу ҳақда вилоят ички ишлар бош бошқармаси ахборот хизмати хабар берди.
Қайд этилишича, 13 декабрь куни вилоят ИИББ уюшган жиноятчиликка қарши кураш бўлими ходимлари томонидан ўтказилган тезкор тадбирда 1978 йилда туғилган, Юқори Чирчиқ туманида яшовчи (М.У.) шахс наманганлик 19 ва 27 ёшли опа-сингилни алдаб, ишончига кириб, уларни мўмай даромад топишга ишонтирган. Тошкент—Ҳиндистон авиайўналиши орқали фоҳишалик билан шуғулланишлари учун юбормоқчи бўлган вақтида Ислом Каримов номидаги Тошкент халқаро аэропортда қўлга олинган.
Аниқланишича, ушланган шахснинг шаръий никоҳдаги хотини ҳозирги кунда Ҳиндистонда бўлиб, қизларни кутиб олиши ва уларга фоҳишалик қилишлари учун шароит яратиши режалаштирилган. Ҳатто қизларнинг Ҳиндистонга бориш ва виза харажатларини ўзлари тўлаб берган.
Ҳозирда ҳолат юзасидан ушланган шахс ва унинг хотинига нисбатан Қибрай тумани ички ишлар бўлими тергов бўлинмаси томонидан Жиноят кодексининг 135-моддаси (одам савдоси) 2-қисми билан жиноят иши қўзғатилган. Шунингдек, жиноятга алоқадор бўлган, муқаддам Паркент туманида яшаган, бугунги кунда Ҳиндистонда бўлиб турган 32 ёшли аёлни ушлаш (экстрадиция қилиш) чоралари кўрилмоқда.
Маълумот ўрнида, вилоят ички ишлар бош бошқармаси тезкор ходимлари томонидан 2022 йилнинг ўтган даври мобайнида 8 та ҳолатда 15 нафар шахс қўлга олинган. Тадбирлар натижасида 12 нафар шахснинг, жумладан, 9 нафар аёлнинг одам савдоси қурбони бўлишининг олди олинган.
Мавзуга доир:
Изоҳ (0)