Shavkat Mirziyoyev Oliy Majlisga murojaatnomasida Samarqand va Namangan shaharlarini alohida ma’muriy-hududiy birliklar sifatida respublika bo‘ysunuviga o‘tkazish taklifini bildirdi. “Daryo” muxbiri Azizbek Abduvaliyev Namangan shahri hokimi G‘ofirjon Jamalov bilan uchrashib, mazkur tashabbus bo‘yicha fikr-mulohazalari bilan qiziqdi.
“Bugungi kunni shahrimiz uchun tarixiy sana deb hisoblash mumkin. Chunki davlat rahbari Namangan sanoat, tadbirkorlik, ta’lim va madaniyat sohalarida mintaqaviy markaz sifatida o‘z o‘rnini topayotganini alohida e’tirof etdi. Chindan ham shahar shiddat bilan rivojlanmoqda. Oddiy misol, 2018-yilda 670 ming aholimiz bo‘lgan bo‘lsa, hozir millionga yaqinlashyapmiz. Oxirgi besh yilda 100 ga yaqin ko‘p qavatli uylar qurilib, 80 mingdan ortiq xonadon foydalanishga topshirildi.
5 yil avval 8600 ta tadbirkorlik subyekti bor edi, bugunga kelib ularning soni 12 mingga yetdi. 3 yil oldin uchta oliy o‘quv yurti faoliyat ko‘rsatgan, hozirda 7 ta bo‘ldi. Aholi nufusi va korxonalar soni oshib borgani sari, tabiiyki, infratuzilma takomillashib borishi, yangi ish o‘rinlari yaratilishi zarur. Buning uchun investitsiyalar jalb etish, xizmat ko‘rsatish va servis, turizmni rivojlantirish talab etiladi. Bunda esa respublika bo‘ysunuvidagi shahar maqomi bizga katta turtki beradi, amalga oshiriladigan ishlarimizni ikki baravar jadallashtiradi”, — deydi Namangan shahar hokimi.
G‘ofirjon Jamalovning qayd etishicha, Namangan bugungi kunda dunyoning 10 dan ortiq shaharlari bilan birodarlashgan. Ularning tajribasi o‘rganilib, eng maqbullarini mahalliy sharoitga tatbiq etish choralari ko‘rilmoqda. Shuningdek, transport tizimini takomillashtirish, shahar bosh rejasini rivojlantirish, Yangi Namangan shaharchasini barpo etish kabi yirik loyihalar amalga oshirilmoqda.
“Respublika bo‘ysunuvidagi shahar maqomining ijobiy tomonlarini ko‘p sanash mumkin, lekin uning barcha bo‘g‘indagi rahbarlar uchun o‘ziga xos salmoqli yuki ham bor. Murojaatnomada ta’kidlanganidek, endi Namangan shahrini har bir soha va yo‘nalish bo‘yicha yanada rivojlantirishning qisqa hamda uzoq muddatli dasturlar ishlab chiqiladi. Bu dasturlar keyinchalik hukumatda himoya qilinadi. Birgina shu vazifaning o‘zi zimmamizga juda katta mas’uliyat yuklaydi”, — deydi Namangan shahri hokimi.
Izoh (0)