Rossiya prezidenti Vladimir Putin mamlakatning Belarusni “o‘zlashtirib olish”, “o‘ziga singdirib olish” rejalarini rad etdi va buni safsata deb atadi. Bu haqda u Belarus prezidenti Aleksandr Lukashenko bilan uchrashuv yakunida tashkil qilingan matbuot anjumanida aytib o‘tdi, deb yozadi “Kommersant”.
“Gap o‘zlashtirib olishda emas, masala iqtisodiy siyosatni kelishib olishda, xuddi boshqa ko‘plab integratsion birlashmalarda bo‘lgani kabi”, — deya Putin bunday mish-mishlar haqidagi savollarga javob berdi.
“Qolgan hammasi aslida bo‘lmagan narsalar, safsata. Bu dushmanlarimizning bizning integratsiya jarayonimizni to‘xtatib qo‘yishga urinishlaridir. Ular esa buni dunyo bozorlarida o‘zlari uchun samarali va xavfli raqobatchilar paydo bo‘lmasligi uchun qilmoqda”, — dedi Rossiya prezidenti.
Rossiya va Belarus Ittifoq davlati 2000-yil yanvaridan buyon mavjud bo‘lib kelmoqda. Ittifoq ishtirokchilari umumiy parlament va konstitutsiya, yagona valyuta yaratishni muhokama qilgan, ammo bunday bitimni qabul qilmagan. 2019-yilda Rossiya tashabbusi bilan muzokaralar qayta boshlandi, 2021-yilda esa tomonlar Rossiya va Belarusning integratsiyalashuviga qaratilgan 28 ta ittifoq dasturlarni kelishib oldi. Vladimir Putinning hisob-kitoblariga ko‘ra, Rossiya va Belarus o‘rtasidagi tovar aylanmasi 2022-yilda rekord darajadagi 40 milliard dollarga yetadi. Bu haqda u 19-dekabr kungi muzokaralarda ma’lum qildi.
Rossiya prezidenti Vladimir Putin 19-dekabr kuni ishchi tashrif bilan Minskka borib, Belarus prezidenti Aleksandr Lukashenko bilan muzokaralar o‘tkazdi.
Oxirgi marta Rossiya va Belarus prezidentlari 26-sentabr kuni Sochida uchrashgandi. Ular iqtisodiy masalalarni, Ittifoq davlatini hamda “kimyo, oziq-ovqat, o‘g‘itlar sohasidagi” qo‘shma rejalarni muhokama qilgandi.
Putin Minskka bundan oldin 2019-yilda kelgan, o‘shanda u Ikkinchi Yevropa o‘yinlari musobaqalarini tomosha qilgan va shu jumladan, Lukashenko bilan ham uchrashgandi.
Izoh (0)