Қирғизистон президенти Садир Жапаров Қатардаги жаҳон чемпионатига бизнес-жетда парвоз қилгани учун танқидга учради. Президент матбуот котиби Эрбол Султанбаев танқидларга жавоб бериб, вазиятга ойдинлик киритди, деб ёзади «24.kg».
Садир Жапаров футбол бўйича жаҳон чемпионатининг финал баҳси учун Қатарга хусусий самолётда учиб кетган, президент матбуот хизмати эса ушбу сафарни «ишчи ташриф» деб атаганди. Қирғизистон ОАВлари маълумотларига кўра, Бишкекдан Доҳага учиш ва қайтиб келиш 50—60 минг долларга тушган бўлиши мумкин.
Танқидларга муносабат билдирар экан, президент матбуот котиби Facebook’даги саҳифасида бугунги кунда хусусий бортни лизингга олиш жараёни тугалланаётганини маълум қилди. Бу Bombardier Challengeр ёки Embraer Legacy бўлади, дея қўшиб қўйди у.
«Қирғизистон томони хорижий мамлакатларга ташрифлар учун ихчам, кичик делегацияларга мўлжалланган ушбу самолётни сотиб олишга қарор қилди. Бунгача у орқали барча парвозлар унга эгалик қилувчи компания билан келишув асосида бепул амалга оширилди. Қирғизистон томони фақат авиация ёнилғиси учун харажатларни ўз зиммасига олди, шу жумладан, президент Жапаровнинг Қатар давлатига бугунги ишчи ташрифи ҳам шундай тарзда амалга оширилди», — деб ёзди президент администрацияси расмий вакили.
Аввалроқ Қирғизистон президенти матбуот хизмати Садир Жапаров ишчи ташриф билан Доҳага учиб кетгани ҳақида хабар берган эди.
Қатар ОАВлари эса у футбол бўйича жаҳон чемпионатига келиб, Франция ва Аргентина ўртасидаги финал баҳсни томоша қилгани ҳақида хабар берди.
Бундан аввал Садир Жапаров Германиядан давлат бюджетига сотиб олинган Airbus H145 вертолётини синовдан ўтказиш жараёнида кийган курткаси муҳокамаларга сабаб бўлганди.
Изоҳ (0)