Австрия пойтахти Венада келиб чиқиши россиялик бўлган Греция фуқароси қўлга олинди. Бу ҳақда Deutsche Welle хабар берди.
Маҳаллий матбуотнинг ёзишича, унинг отаси Россия Бош штабининг собиқ ходими бўлиб, аввал Германия ва Австрияда дипломат бўлиб ишлаган. Ҳибсга олинган шахс Россия фойдасига жосусликда гумон қилинмоқда. Бунинг учун унга беш йилгача қамоқ жазоси берилиши мумкин.
Гумонланувчи Россия расмийларига Австриядаги умумий ижтимоий вазият, ташқи сиёсат ва мамлакатдаги хавфсизлик ҳолати ҳақида маълумот бергани айтилмоқда. 2018 йилдан 2022 йилнинг бошигача у Россия, Беларусь, Туркия ва Грузияга 65 та саёҳатни амалга оширган. Сўнгги бор Москвага Россиянинг Украинага бостириб кириши арафасида учган.
Австрияда кичик ижтимоий нафақада бўлган гумонланувчи қандайдир тарзда Вена, Россия ва Грецияда бир нечта мулкни сотиб олган. 2022 йил март ойи охирида Австрия ҳуқуқ-тартибот идоралари гумонланувчининг квартирасида тинтув ўтказган, натижада тинглаш мосламаларини кузатиш қурилмаси, яширин видеокамералар ва ҳимоя кийими топилган.
Бундан ташқари, ҳуқуқ-тартибот идоралари ходимлари 10 миллионга яқин файл сақланган бир нечта телефон, ноутбук ва планшетларни мусодара қилган.
Мавзуга доир:
- Швецияда эр-хотин Россияга жосуслик қилишда айбланиб, ҳибсга олинди
- Лондонда Россия фойдасига жосусликда гумонланаётган эркак ҳибсга олинди
- Нидерландия ва Бельгия жосусликда гумон қилинган 38 нафар россиялик дипломатларнинг мамлакатлар ҳудудидан чиқариб юборилаётганини хабар қилди
- Швецияда икки эркак Россия фойдасига жосуслик қилишда айбланди
Изоҳ (0)