“Prezident e’tibori menga kuch berdi”. Hokim “sindirish”ga uringan tadbirkorni prezident siyladi
Bundan ikki yil avval “Daryo” nashrida Qashqadaryo viloyatida faoliyat yurituvchi tadbirkor, paxtachilik klasteri rahbari Nurbek Ergashev bilan bog‘liq muammolar, tadbirkorning faoliyatiga to‘siq qo‘yilgani haqida turkum maqolalar e’lon qilingandi. O‘shanda Qarshi tumanining sobiq ayol hokimi Maqsuda Mustafoyeva tadbirkorning paxta uchun davlatdan olgan kredit mablag‘ini g‘allaga, g‘alla kombaynlari ta’miriga sarflashi kerakligini aytgani, tadbirkor esa bunga e’tiroz bildirgani yozilgandi.
Tadbirkorga bog‘cha, maktab qurib bermayotganini, telefon qo‘ng‘iroqlariga javob bermasligiyu, selektorlarda ishtirok etmasligini aytgan hokim undan 15 ming gektar yerini tortib olgandi.
Taqdir taqozosini qarangki, tuman hokimi “sindirishga” uringan tadbirkorni bugungi kunga kelib prezident Shavkat Mirziyoyev siyladi. Uning mehnatlari e’tirof etilib, tadbirkorga “Do‘stlik” ordeni topshirildi.
“Daryo” davlat rahbari e’tirofiga erishgan tadbirkorni yana suhbatga tortdi va ayni kundagi fikrlari bilan qiziqdi.
Shaxsan davlat rahbarining o‘zi “nima muammoying bor, mendan qanday yordam kerak”, demoqda
So‘nggi yillarda O‘zbekistonda tadbirkorlikni rivojlantirish uchun katta qadam tashlandi va buning uchun kerakli barcha ishlar qilinyapti. Soha rivoji uchun shaxsan prezidentimiz Shavkat Mirziyoyevning o‘zi bosh-qosh bo‘lmoqda. Bu esa biz tadbirkorlarga kuch, ishtiyoq beryapti. Ayniqsa prezidentimizning tadbirkorlar bilan shaxsan, yuzma-yuz ko‘rishib, muloqot qilishi bizga kuch beryapti. Tasavvur qiling, shaxsan davlat rahbarining o‘zi “nima muammoying bor, mendan qanday yordam kerak”, deb turgach, bizga bundan ortiq nima kerak?”, — deydi tadbirkor Nurbek Ergashev.
“Prezidentimiz e’tiborida ekanimdan quvondim”
O‘sha kuni safardan qaytgandim. Toshkentga borishingiz kerak deyishgach, prezidentimiz bilan muloqotga chaqirilganimdan judayam quvondim. Ishonasizmi, mukofot berilishini bilganimda judayam quvondim. To‘g‘risi, men uchun kutilmagan holat bo‘ldi. Bu mukofot nafaqat mening, oilam, jamoam, yaqinlarim va Qashqadaryo ahlining mukofoti bo‘ldi”, — deydi tadbirkor.
Prezident bilan uchrashuvda ishtirok etishim haqida eshitganimdan so‘ng o‘zimni qiynab kelayotgan barcha muammolar haqida gap ochaman, shaxsan prezidentimizdan bu haqda so‘rayman deb niyat qildim va shu niyatda Toshkentga bordim. Balki, ishonmassiz, lekin men aytmoqchi bo‘lgan barcha muammo zalda prezidentimiz tomonidan aytildi. Hatto bu muammolar yechimi haqida ham ma’lumot berildi. Qisqasi men va men kabi tadbirkorlarni qiynab kelayotgan muammolarni prezidentimiz oldindan bilgan va biz bilan uchrashuvda aynan shu masalalarni shaxsan o‘zlari gapirdi. Savolga o‘rin qolmadi”, — deydi suhbatdosh.
Tadbirkorning esga olishicha, Qarshi tumanining sobiq hokimi Maqsuda Mustafoyeva bilan bog‘liq jarayonlar, ya’ni faoliyatiga to‘siq qo‘yilishi, nohaq ayblanib, yeri tortib olingani bilan bog‘liq voqealar uni ranjitgan. Ammo davlat rahbarining e’tirofi o‘sha mashaqqatlarni yoddan chiqarishiga yordam bergan.
Tan olish kerak, Qarshi tumanining sobiq hokimi Maqsuda Mustafoyeva bilan bog‘liq jarayonlar, sudlashishlar sohaga nisbatan qiziqishim yo‘qolishiga, ey, deb barchasiga qo‘l siltashimgacha olib borgan. Lekin oilamning, yaqinlarimning, qo‘l ostimda faoliyat yuritayotgan ishchilarimning ishonchi va qo‘llab-quvvatlashi sabab yana yo‘limda davom etdim. Va bugun xato qilmaganimni, vaqtida chekilgan mashaqqatlarning kun kelib rohati bo‘lishini tushunib yetdim. Shaxsan davlat rahbari bizning kichkina mehnatimizni e’tirof etib, qo‘llab-quvvatlayotgani boshimdan o‘tkazgan barcha qiyinchiliklar, mashaqqatlarni esdan chiqarishimga yordam beryapti”, — deydi Nurbek Ergashev.
Kompaniyamiz 12 ta yo‘nalish bo‘yicha faoliyat ko‘rsatadi. Bu yerda 2 ming 800 nafar ishchi bor. Dalada paxtani urug‘lashdan tortib, uni yetishtirish, qayta ishlash va eksport qilish ishlari bilan shug‘ullanamiz. Bir vaqtning o‘zida 50 ming tonna paxtani, 30 ming tonna chigit, 20 tonna tolani qayta ishlab, tayyor mahsulot tarzida eksport qilish imkoniyatimiz bor. Biroq, yerimiz tortib olingani bois, ayni kunda xomashyo taqchilligi bor. Shunga qaramasdan xomashyoni birjada sotib olib, ishimizni davom ettirib kelyapmiz. Bundan tashqari 1000 ta asalari uyi bor. Tog‘ asalini qadoqlab, eksport qilish bilan shug‘ullanamiz. Turkiya bilan urug‘chilik bo‘yicha qo‘shma korxona tashkil etganmiz. Qolaversa, biolaboratoriyamiz bor. Ishchilarimiz 2 million so‘mdan 10 million so‘mgacha maosh oladi”, — deydi tadbirkor.
Qarshi tumanidagi faoliyatimiz davomida tumanning sobiq hokimi bilan bog‘liq sud jarayonlari, tadbirkorga qilinayotgan munosabatdan keyin tadbirkorlikni yig‘ishtiraman degan qaror ham bo‘lgan, ammo oilamning, yaqinlarimning, jamoamning qo‘llab-quvvatlagani, ularning menga ishonch bildirgani yana ishlashga undagan. Prezidentimizning tadbirkorlar bilan uchrashuvida bir tadbirkor davlatimiz rahbariga “buncha ko‘p energiyani qayerdan olasiz, buning sirini bizga ham ayting”, deganida, “buning hech qanday siri yo‘q, eng asosiysi Vatanni sevish kerak”, dedilar-ku, men ham o‘sha his tuyg‘u bilan shu paytga qadar ishlab keldim. Ishimni sevdim, jamoamni sevdim, Qashqadaryo xalqini sevdim va aholiga yaxshi ish o‘rni yaratish, ularni qo‘llab-quvvatlash ishtiyoqi menga kuch bergan. Biz ishlab chiqarayotgan mahsulotlar jahonda Sulton brendi bilan chiqsa, ishchilarimizga yaxshi maosh bersak bizdan baxtli inson yo‘q”, — deydi tadbirkor.
Murodjon Berdialiyevich viloyatga rahbar bo‘lib kelgan kunidan boshlab, tadbirkorlar bilan ko‘rishdi. Ularni tingladi. Tadbirkorlarni qiziqtirgan muammolarni o‘rgandi. Viloyat hokimining shaxsan o‘zi tadbirkorlarni qo‘llab-quvvatlamoqda. O‘zlari xabar olib, qanday muammolar bor, mendan qanday yordam kerak deb so‘rab turadi. Menda ham muammo bo‘lsa, shaxsan viloyat hokimiga telefon qilib, aytish imkoniyatim bor. Xullas, byurokratiya yo‘q. Qo‘llab-quvvatlash zo‘r”, — deydi tadbirkor.
Nurbek Ergashev O‘zbekiston prezidentining tadbirkorlarga bu qadar g‘amxo‘rligiga tadbirkorlar ham munosib javob qaytarishi kerak degan fikrda.
“Yaratib berilayotgan barcha imkoniyatlar va shaxsan prezidentning g‘amxo‘rligiga biz tadbirkorlar ham munosib javob berishimiz kerak deb o‘ylayman. Bu qadar imkoniyat va e’tibor, qo‘shimchasiga imtiyozga o‘z vaqtida yaxshi ishlab, eksport salohiyatini oshirib, prezidentimiz, xalqimiz oldida o‘zimizni ko‘rsatishimiz kerak”, — deydi tadbirkor.
