AQSH prezidenti Jo Baydenning maslahatchilari, agar davlat rahbari yangi muddatga o‘z nomzodini qo‘yishga qaror qilsa, uning saylovoldi kampaniyasiga tayyorgarlikni muhokama qilmoqda, deb yozadi The Wall Street Journal.
Jamoa hozirda ko‘rib chiqayotgan mavzular — saylovoldi shtabining tuzilishi, uning asosiy xodimlari, shuningdek, bo‘lajak shtab-kvartirani qayerga joylashtirish. Ehtimoliy variantlar orasida Filadelfiya (2020-yilda koronavirus pandemiyasi boshlanishidan oldin shtab-kvartira o‘sha yerda joylashgan) va Baydenning ona shahri Uilmington (Delaver shtati) bor.
AQSH prezidenti Arizona va Michigan shtatlariga so‘nggi safarlari chog‘ida keyingi saylovlarda qatnashishi mumkinligi haqida gapirgandi, deb xabar bermoqda WSJ. Yakuniy qarorni u bayram kunlarida oila a’zolari bilan muhokamadan so‘ng qabul qilmoqchi.
Baydenning maslahatchilari tafsilotlarni muhokama qilishdan bosh tortdi, deb yozadi gazeta.
Aprel oyida The Hill nashri amaldagi davlat rahbari 2024-yilgi saylovlarda ishtirok etish niyatini “hammaga ochiq bildirmoqda” deb xabar qilgandi. Nashr manbasiga ko‘ra, u bu haqda sobiq prezident Barak Obama bilan muhokama qilgan. Oq uy bunday rejalarni tasdiqladi. Iyun oyida The New York Times ba’zi demokratlar Baydenning reytingi sabab uning g‘alaba qozonishiga ishonchi komil emasligini yozgandi. Shu bilan birga, ko‘plab Demokratik partiya tarafdorlari “boshqa istalgan demokrat Baydendan yaxshiroq ishlaydi” degan fikrlarni rad etgan.
WSJ ma’lumotlariga ko‘ra, 20-noyabr kuni 80 yoshga to‘lgan Baydenning reytingi oxirgi paytlarda pasayib ketgan. Gazetalar tomonidan o‘tkazilgan so‘rovda ishtirok etgan saylovchilarning 43 foizi amaldagi davlat rahbariga ijobiy, 54 foizi esa salbiy munosabatda ekanini bildirgan.
Izoh (0)