AQSH Mudofaa vazirligining noma’lum uchar jismlarni o‘rganuvchi maxsus guruhi so‘nggi vaqtlarda NUJlar aniqlangani haqida bir necha yuzlab xabarlar olgan. Bu haqda Pentagonning razvedka bo‘yicha vazir o‘rinbosari Ronald Moultri ma’lum qildi. Biroq uning so‘zlariga ko‘ra, muassasa ushbu obyektlar Yerdan tashqaridagi hayotga aloqador ekanini isbotlovchi dalillarni topa olmagan.
“Biz kuzatgan obyektlardan birortasi Yerdan tashqarida kelib chiqqanini taxmin qilish imkonini beruvchi hech narsani ko‘rmadik”, — dedi Ronald Moultri CBS’ga bergan intervyusida. “Yerga o‘zga sayyoraliklar tashrif buyurgani yoki bu yerda o‘zga sayyoraliklar fazoviy kemasi halokatga uchraganini taxmin qilish uchun asos bo‘lishi mumkin bo‘lgan hech narsani ko‘rmadim”, — deya aniqlik kiritdi u.
Pentagonning NUJlarni o‘rganish bo‘yicha guruhi so‘nggi marta 2021-yilda o‘z ishi haqida hisobot e’lon qilgandi. O‘shanda idora noma’lum uchar jismlar aniqlangani haqidagi 144 ta xabar o‘rganib chiqilganini ma’lum qilgandi. Pentagon ushbu obyektlarning ba’zilari AQSH milliy xavfsizligiga tahdid solganini aytgandi: ular harbiy bazalar va poligonlar yaqinida aniqlangan.
Pentagon 2020-yil avgustida NUJlar paydo bo‘lishi holatlarini o‘rganish uchun ishchi guruhi tuzilganini e’lon qilgandi. Shuningdek, avvalroq AQSh mudofaa idorasi NUJlar aks etgan videoni e’lon qilgan, ularning kelib chiqishini aniqlashga muvaffaq bo‘linmagan edi.
2022-yil boshida esa AQSh mudofaa vazirligi — Pentagon noma’lum uchar jismlarni (NUJ) o‘rganadigan, bu kabi holatlarni tergov qiladigan alohida bo‘linma tashkil qilinishi xabar berildi.
Eslatib o‘tamiz, avvalroq AQShning sobiq prezidenti Barak Obama Pentagonning maxfiy arxivlarida harakatlanish prinsipi tushunarsiz bo‘lgan uchar likopchalarning fotosuratlari saqlanishi haqida gapirgan edi.
Izoh (0)