Ukraina prezidenti Vladimir Zelenskiy Rossiya rahbari Vladimir Putin bilan ringga chiqib, uning yuziga musht tushirishga tayyorligini ma’lum qildi. Bu haqda u Fransiyaning LCI telekanaliga bergan intervyusida aytib o‘tdi.
“Masalani haqiqiy erkaklardek hal qilish uchun Putin bilan ringga chiqishga tayyorman”, — dedi u.
“Agar haqiqiy erkak kimgadir qanaqadir xabar yetkazmoqchi bo‘lsa yoki uning basharasiga musht tushirmoqchi bo‘lsa — buni o‘zi qiladi, vositachilarni jo‘natmaydi”, — dedi Ukraina prezidenti.
U agar shunday taklif kelib tushsa, ertagayoq ringga tushishi mumkinligini qo‘shib qo‘ydi.
Shu intervyu chog‘ida Zelenskiy unga Putin bilan muzokaralar o‘tkazishni taklif qilishayotganini aytgandi. Biroq uning fikricha, “narsalarga nisbatan qarashlar” har xil bo‘lgani sababli, ular muhokama qiladigan hech qanday mavzu yo‘q.
“Bilaman, ba’zilar u bilan muzokaralar stoliga o‘tirishni taklif qilmoqda, lekin u bilan nimani muhokama qilishni bilmayman. U o‘z nuqtayi nazariga to‘g‘ri keladigan tinchlikni xohlayapti, lekin bizning qarashlarimiz mutlaqo boshqa-boshqa”, — dedi Zelenskiy.
Izoh (0)