Oq uy Rossiya Kiyevga hujum qilishga tayyorlanayotganidan darak beruvchi belgilarni ko‘rmayapti

Oq uy vakili Jon Kirbi AQSH rahbariyati Rossiya Kiyevga hujum qilishga tayyorlanayotganidan darak beruvchi belgilarni ko‘rmayotganini aytdi. Shu bilan birga, u AQSH rahbariyati frontdagi vaziyatni kuzatishda davom etishini va’da qildi.

“Men razvedka ma’lumotlari tafsilotlarini keltirib o‘tirmayman, ammo aynan hozir Kiyevga hujum tayyorlanayotganini bildiruvchi hech qanday dalillarni ko‘rmayapmiz”, — dedi Kirbi brifingda.

15-dekabr kuni Ukraina qurolli kuchlari bosh qo‘mondoni Valeriy Zalujniy Kiyevga hujumni Rossiya uchun harbiy nizoni tugatishning eng oddiy usuli deb atadi, biroq Rossiya harbiy rahbariyati Donbassga bor e’tiborni qaratishga qaror qildi.

10-oktabrdan buyon Rossiya Ukraina energetika infratuzilmasiga zarbalar berib kelmoqda. 16-dekabr kuni Ukraina hukumati Kiyev, Xarkov, Nikolayev, Dnepropatrovsk va Ternopol viloyatlaridagi portlashlar haqida xabar berdi. “Ukrenergo” elektr energiya tizimi operatori favqulodda vaziyat haqida e’lon qildi.

29-mart kuni Rossiya Mudofaa vazirligi Kiyev va Chernigov yo‘nalishlarida harbiy faollik kamaytirilganini e’lon qildi. Bu qaror Rossiya va Ukraina delegatsiyalari o‘rtasida Istanbulda bo‘lib o‘tgan muzokaralardan keyin qabul qilindi. May oyida muzokaralar Ukraina tomoni tashabbusi bilan to‘xtatildi.