АҚШ президенти Жо Байденнинг маслаҳатчилари, агар давлат раҳбари янги муддатга ўз номзодини қўйишга қарор қилса, унинг сайловолди кампаниясига тайёргарликни муҳокама қилмоқда, деб ёзади The Wall Street Journal.
Жамоа ҳозирда кўриб чиқаётган мавзулар — сайловолди штабининг тузилиши, унинг асосий ходимлари, шунингдек, бўлажак штаб-квартирани қаерга жойлаштириш. Эҳтимолий вариантлар орасида Филаделфия (2020 йилда коронавирус пандемияси бошланишидан олдин штаб-квартира ўша ерда жойлашган) ва Байденнинг она шаҳри Уилмингтон (Делавер штати) бор.
АҚШ президенти Аризона ва Мичиган штатларига сўнгги сафарлари чоғида кейинги сайловларда қатнашиши мумкинлиги ҳақида гапирганди, деб хабар бермоқда WSJ. Якуний қарорни у байрам кунларида оила аъзолари билан муҳокамадан сўнг қабул қилмоқчи.
Байденнинг маслаҳатчилари тафсилотларни муҳокама қилишдан бош тортди, деб ёзади газета.
Апрель ойида The Hill нашри амалдаги давлат раҳбари 2024 йилги сайловларда иштирок этиш ниятини «ҳаммага очиқ билдирмоқда» деб хабар қилганди. Нашр манбасига кўра, у бу ҳақда собиқ президент Барак Обама билан муҳокама қилган. Оқ уй бундай режаларни тасдиқлади. Июнь ойида The New York Times баъзи демократлар Байденнинг рейтинги сабаб унинг ғалаба қозонишига ишончи комил эмаслигини ёзганди. Шу билан бирга, кўплаб Демократик партия тарафдорлари «бошқа исталган демократ Байдендан яхшироқ ишлайди» деган фикрларни рад этган.
WSJ маълумотларига кўра, 20 ноябрь куни 80 ёшга тўлган Байденнинг рейтинги охирги пайтларда пасайиб кетган. Газеталар томонидан ўтказилган сўровда иштирок этган сайловчиларнинг 43 фоизи амалдаги давлат раҳбарига ижобий, 54 фоизи эса салбий муносабатда эканини билдирган.
Изоҳ (0)