Xalqaro futbol federatsiyasi (FIFA) Ukraina prezidenti Vladimir Zelenskiyga Qatarda bo‘lib o‘tayotgan futbol bo‘yicha jahon chempionati finali oldidan “butun dunyoda tinchlik haqidagi murojaat” bilan chiqish imkoniyatini taqdim etishdan bosh tortdi. Bu haqda CNN o‘z manbasiga tayanib xabar bermoqda.
Uning so‘zlariga ko‘ra, bunday tashabbus bilan Ukraina prezidenti ofisi chiqqan. U yerda JCH final o‘yini oldidan stadionda Zelenskiyning videomurojaatini ko‘rsatishni so‘rashgan va rad javobidan hayratga tushishgan. “FIFA o‘z platformasidan ezgu maqsadlarda foydalanishni xohlaydi, deb o‘ylardik”, — dedi manba va futbol federatsiyasida muzokaralar hali davom etayotganini ta’kidladi.
FIFA CNN xabarini izohlaganicha yo‘q.
Qatarda JCH finali 18-dekabr kuni bo‘lib o‘tadi, unda Argentina va Fransiya bahs olib boradi.
Vladimir Zelenskiyning ofisi Ukrainadagi urushga qo‘shimcha e’tiborni jalb etish uchun yirik xalqaro tadbirlardan foydalanishga intilib keladi.
Avvalroq Zelenskiy Kann festivalida va “Gremmi” musiqiy mukofotlarini topshirish marosimida nutq bilan chiqqan. Ukraina yetakchisining ofisi uning “Oskar”da ham chiqish qilishini tashkillashtirmoqchi bo‘lgan, biroq bu amalga oshmagan.
Izoh (0)