The Wall Street Journal газетаси 16 декабрь куни мақола чиқарди, унда Украина махсус хизматларига таяниб, Россия президенти Владимир Путин Чеченистон раҳбари Рамзан Қодировга Киевда ҳукумат бинолари жойлашган даҳани эгаллаб олиб, Украина президенти Владимир Зеленскийни ўлдиришни буюргани ҳақида ёзди. Россия президенти матбуот котиби Дмитрий Песков ушбу маълумотларни сафсата деб атади.
«Бу мутлақо сафсата», — дея Песков бу хабарга изоҳ берди. WSJ’га берган интервьюсида матбуот котиби Владимир Зеленскийга нисбатан «буюртма»ни «бутунлай бемаъни, асоссиз ва ёлғон гап» деб атади. Рамзан Қодировнинг аппаратида ушбу хабар юзасидан изоҳ берилганича йўқ.
25 февраль куни, Украинада жанговар ҳаракатлар бошланганидан кейин бир кун ўтиб, Владимир Зеленский Россия унга нисбатан суиқасд тайёрлаётганини ва уни «биринчи рақамли нишон» деб ҳисоблашини айтганди. Ўша куниёқ Дмитрий Песков Россия Владимир Зеленскийни Украина президенти деб тан олишини маълум қилди.
Изоҳ (0)