Rossiya Kiyevga hujum qilishga tayyorlanayotganini ko‘rmadik — Oq uy

AQSH Rossiyaning Kiyevga hujum qilishga tayyorgarlik ko‘rayotgani belgilarini aniqlamadi. Bu haqda Oq uy Milliy xavfsizlik kengashi vakili Jon Kirbiga tayanib, “TASS” xabar berdi.

Kirbining so‘zlariga ko‘ra, hukumat Rossiyaning harakatlarini diqqat bilan kuzatmoqda. “Biz hozir Kiyevga hujum qilishga tayyorgarlik bo‘layotganiga oid hech qanday dalil ko‘rmayapmiz”, — deydi Oq uy rasmiysi.

Shuningdek, u Ukraina uchun navbatdagi yordam paketi tez orada e’lon qilinishini va yangi paketga havo hujumidan mudofaa tizimlari kiritilishini qo‘shimcha qildi. AQSH Senati 2023-yil uchun rekord darajadagi 858 milliard dollarlik mudofaa byudjetini qabul qildi.

Mudofaa byudjeti loyihasida, Rossiyani Yevropada “ushlab turish” uchun 6 milliard dollar, shuningdek, Ukrainaga yordam berish uchun qo‘shimcha 800 million dollar ajratish ko‘zda tutilgan. AQSHning Rossiya bilan harbiy sohada hamkorligiga qo‘yilgan taqiq besh yilga cho‘zilgan.

Ma’lumot o‘rnida, 16-dekabr kuni Rossiya Ukrainaning qator hududlariga 76 ta raketa uchirdi, ularning 40 ga yaqini Kiyevni nishonga olgan.