Ukraina hukumatida mamlakat rahbariyatidan birortasi, jumladan, davlat rahbari o‘ldirilgan taqdirda “B reja bor”, dedi prezident Vladimir Zelenskiy Shveysariyaning Davos shahridagi Ukraina uyiga yig‘ilganlarga video formatda so‘zlagan nutqida.
Zelenskiyning so‘zlariga ko‘ra, rasmiylar voqealar rivoji shunday kechgan taqdirda, chora ko‘rishga tayyor: “Bizning qonunchiligimizga ko‘ra, davlatni boshqaradigan odam bo‘ladi. Biz tayyorgarlik ko‘rib qo‘yganmiz va bo‘linganmiz — men, bosh vazir va parlament rahbari”.
Zelenskiy Ukraina parlamentli prezidentlik respublikasi ekanini eslatdi. “Agar u yoki bu tarzda yo‘qotish bo‘lsa, biz bu jarayonga tayyor bo‘lishimiz kerakligini bilardik. Vazirlar Mahkamasini ikki qismga bo‘ldik, bu esa mamlakatning hatto bunday oqibatlarda ham himoyasiz qolmasligi uchun ikkita dubl bo‘ldi”, — dedi u.
Ukraina prezidenti uning hayotiga tahdid davom etayotganini tan oldi. “Ammo men tirikman va bu gologramma emas, siz bilan chinakamiga gaplashib turibman”, — deb hazillashdi u.
Aprel oyi boshida Ukraina prezidenti ofisi vakillari Rossiya bosqinining boshidan beri Vladimir Zelenskiyga o‘ndan ortiq suiqasd uyushtirilganini aytishgan edi. “Soqchilarimiz bu masalalar bilan shug‘ullanmoqda va bu yerga ov uchun kelgan muammoli unsurlarni yo‘q qilmoqda”, — degan Zelenskiyning o‘zi suiqasdga urinishlar haqida Rossiya OAVlariga bergan intervyusida. Rossiya prezidentining matbuot kotibi Dmitriy Peskov fransuz telekanaliga bergan intervyusida, Rossiya Zelenskiyni o‘ldirishni rejalashtirganmi, degan savolga “unday emas” deb javob berdi.
Izoh (0)