“Chegara bilmas muxbirlar” xalqaro nohukumat tashkilotining yil yakuni bo‘yicha hisobotiga ko‘ra, Meksika ketma-ket to‘rtinchi yil jurnalistlar uchun eng xavfli davlat bo‘lib qolmoqda, 2022-yilda u yerda 11 nafar OAV xodimi halok bo‘ldi. Bu yil ro‘yxatda ikkinchi o‘rinni Ukraina egalladi.
Hisobotga ko‘ra, 2022-yilda dunyoda halok bo‘lgan jurnalistlar sonining ortishiga, jumladan, Ukrainadagi voqealar ham sabab bo‘lgan.
“Ikki yillik nisbiy tin olish va tarixiy past ko‘rsatkichlardan so‘ng, 2022-yilda o‘z faoliyati ortidan o‘ldirilgan jurnalistlar soni 18,8 foizga o‘sdi”, — dedi tashkilot vakillari hamda Ukrainadagi voqealar “bu o‘sishning sabablaridan biri” ekanini qo‘shimcha qildi.
Tashkilot ma’lumotlariga ko‘ra, Meksika jurnalistlar uchun eng xavfli mamlakat bo‘lib qolmoqda, mamlakatda yil davomida 11 nafar OAV xodimi o‘ldirilgan, Ukrainada esa sakkiz nafar jurnalist halok bo‘lgan.
Ma’lumot uchun, “Chegara bilmas muxbirlar” tomonidan tuziladigan So‘z erkinligi indeksining 2022-yilgi reytingida O‘zbekiston o‘z ko‘rsatkichlarini birdan 24 pozitsiyaga yaxshilab, 157-o‘rindan 133-o‘ringa ko‘tarilgan edi. Ushbu reytingda dastlabki uchlikni Norvegiya, Daniya va Shvetsiya egallagan. Rossiya esa 155-o‘ringa tushib ketgan. Reytingdagi oxirgi 180-o‘rinda Shimoliy Koreya, 179-o‘rinda Eritreya joylashgan.
Izoh (0)