Germaniyada 23 ming kishi davlat to‘ntarishiga urinishda gumonlanmoqda

Germaniyada davlat to‘ntarishida necha kishi qatnashmoqchi bo‘lgani ma’lum qilindi. Bu haqdagi tafsilotlar Germaniya Ichki ishlar vazirligi saytiga joylandi.

Ularga ko‘ra, mamlakatda davlat to‘ntarishini rejalashtirishga aloqador deb gumon qilinayotgan siyosiy guruhlar ishtirokchilari soni 23 ming kishiga yetadi. Ularni yagona harakat deb atab bo‘lmaydi, lekin ularning barchasini ekstremistik guruhlar deb hisoblash mumkin.

“‘Reyx fuqarolari’ (Reichsbürger) va ‘O‘z-o‘zini boshqarish’ (Selbstverwalter) o‘rtasida, shuningdek, bu guruhlarning o‘zida ham ichki mafkuraviy va boshqa ziddiyatlar bor, ularning a’zolari ko‘pincha bir-biriga zid bo‘lgan fitna nazariyalariga tayanadi. Shu tufayli ularning tarafdorlarining bir qismini o‘ng ekstremizmga kiritish mumkin”, — deyiladi vazirlik xabarida.

Biroq IIV qayd etishicha, ushbu harakatlar ishtirokchilari soni baribir katta — 23 ming kishi.

“Ularning qariyb 1250 nafari o‘ng ekstremistik fraksiyalarga aloqador. Zo‘ravonlikka maqsadga erishish usuli sifatida qaraydiganlar taxminan 2100 kishini tashkil etadi. Ayni vaqtda 500 kishida qonuniy tarzda sotib olingan qurol aniqlandi”, — deyiladi idora saytida.

Xavfsizlik kuchlari fikricha, hukumat bu odamlar tug‘dirishi mumkin bo‘lgan xavfga juda jiddiy qarashi kerak, chunki ular “zamonaviy Germaniyaning davlat sifatida mavjudligini, shu jumladan, uning huquqiy tizimini rad etadi”.

“‘Reyxsbyurger’ guruhi, kontrrazvedka da’vo qilishicha, 286 ta qurolli guruhni tuzishni rejalashtirgan, ular butun mamlakat bo‘ylab ichki xavfsizlik uchun javob berishi va tozalashlar o‘tkazishi kerak bo‘lgan, ularni hatto qotilliklar ham to‘xtata olmasligi kerak edi”, — deyiladi IIV xabarida.

Eslatib o‘tamiz, 7-dekabr kuni Germaniyada mamlakat miqyosidagi eng yirik maxsus operatsiyalardan biri o‘tkazildi. Uch ming nafar politsiyachi 130 dan ortiq uylarda, ofislarda va omborxonalarda tintuvlar olib bordi. Natijada 25 kishi hibsga olindi, ular Germaniyada davlat to‘ntarishini rejalashtirishda gumonlanmoqda, bundan tashqari, yana 27 nafar gumonlanuvchi ham bor.

Ushbu operatsiya doirasida Germaniyada kelib chiqishi 700 yillik Royss knyazlik oilasidan bo‘lgan shahzoda Genrix XIII ham hibsga olindi.