«Чегара билмас мухбирлар» халқаро ноҳукумат ташкилотининг йил якуни бўйича ҳисоботига кўра, Мексика кетма-кет тўртинчи йил журналистлар учун энг хавфли давлат бўлиб қолмоқда, 2022 йилда у ерда 11 нафар ОАВ ходими ҳалок бўлди. Бу йил рўйхатда иккинчи ўринни Украина эгаллади.
Ҳисоботга кўра, 2022 йилда дунёда ҳалок бўлган журналистлар сонининг ортишига, жумладан, Украинадаги воқеалар ҳам сабаб бўлган.
«Икки йиллик нисбий тин олиш ва тарихий паст кўрсаткичлардан сўнг, 2022 йилда ўз фаолияти ортидан ўлдирилган журналистлар сони 18,8 фоизга ўсди», — деди ташкилот вакиллари ҳамда Украинадаги воқеалар «бу ўсишнинг сабабларидан бири» эканини қўшимча қилди.
Ташкилот маълумотларига кўра, Мексика журналистлар учун энг хавфли мамлакат бўлиб қолмоқда, мамлакатда йил давомида 11 нафар ОАВ ходими ўлдирилган, Украинада эса саккиз нафар журналист ҳалок бўлган.
Маълумот учун, «Чегара билмас мухбирлар» томонидан тузиладиган Сўз эркинлиги индексининг 2022 йилги рейтингида Ўзбекистон ўз кўрсаткичларини бирдан 24 позицияга яхшилаб, 157-ўриндан 133-ўринга кўтарилган эди. Ушбу рейтингда дастлабки учликни Норвегия, Дания ва Швеция эгаллаган. Россия эса 155-ўринга тушиб кетган. Рейтингдаги охирги 180-ўринда Шимолий Корея, 179-ўринда Эритрея жойлашган.
Изоҳ (0)