“Bloger degani faqat tanqid qiladi degani emas, pishiriq pishiradigan bloger ham bor” — Umid G‘ofurov

“Daryo” internet-nashri Toshkent shahri hokimligi qoshidagi Jamoatchilik kengashi bilan birgalikda “Mahalla. Muammo. Mulohaza” loyihasini taqdim etib kelmoqda. Loyihaning 10-soni mavzusi “Axborot vositalari va davlat organlari munosabati” bo‘lib, dastur mehmoni sifatida bloger Umid G‘ofurov taklif etildi.

Dastur mehmoni bloger so‘zining ma’nosiga to‘xtalib, u faqat tanqid qiluvchi inson emas, istalgan sohani yorituvchi shaxs bo‘lish mumkinligini aytdi.

Media sohasida qanday qilib sifatli, foydali, saviyali kontent yaratishni o‘rgatish niyatim bor. Menga ko‘pchilik aytadi: “Bloger bo‘lmoqchiman, men ham tanqid qilmoqchiman sizga o‘xshab”. Yo‘q, tanqid bu bloging emas. To‘g‘ri, menda shunaqa bo‘lib qolgan, o‘zim bilmagan holda muammolarni yoritadigan blogerga aylanib qolganman, chiqolmayapman.

Lekin bloging va kontent faqatgina muammolar, tanqid, siyosiy mavzular degani emas. Buni ko‘pchilik, ayniqsa, yoshi kattalar tushunmay qoladi. Ularga bloger ekaningizni aytsangiz, “Menga falon mavzuni yoritib ber”, deydi. Aslida u shunchaki pishiriq pishiradigan bloger bo‘lishi mumkin-da, — deya fikrlarini izohlagan Umid G‘ofurov.