Oliy sud matbuot xizmatining ma’lum qilishicha, 13-dekabr kuni bloger Olimjon Haydarovga nisbatan yuritilgan ma’muriy huquqbuzarlik to‘g‘risidagi ish ko‘rib chiqildi.
Qayd etilishicha, jinoyat ishlari bo‘yicha O‘zbekiston tumani sudida Ma’muriy javobgarlik to‘g‘risidagi kodeksning 201-moddasi (yig‘ilishlar, mitinglar, ko‘cha yurishlari yoki namoyishlar uyushtirish, o‘tkazish tartibini buzish) 1-qismi va 202-2-moddasi (yolg‘on axborot tarqatish) 2-qismida nazarda tutilgan ma’muriy huquqbuzarlik harakatlari bo‘yicha bloger Olimjon Haydarovga nisbatan ish ko‘rilgan.
Sudning qarori bilan Haydarov Ma’muriy javobgarlik to‘g‘risidagi kodeksning yuqorida ko‘rsatilgan moddalarida nazarda tutilgan ma’muriy huquqbuzarliklarni sodir etgan deb topilib, unga mazkur kodeksning 34-moddasi (bir necha huquqbuzarlikni sodir etganlik uchun ma’muriy jazo qo‘llash) tartibida bazaviy hisoblash miqdorining 70 baravari (21 000 000 so‘m) miqdorida jarima solindi.
Ma’lumot uchun, Farg‘onada aholiga gaz yetkazib berish uchun korxonalar gazdan uzilganini bila turib norozilik uyushtirgan ishchilar qamalgani haqida xabar berilgandi.
29-noyabr kuni tuman gaz idorasi mas’ul xodimlari tomonidan Albus zavodiga ulangan gaz tarmog‘i tekshirilganda ushbu zavod o‘zboshimchalik bilan qaytadan gaz tarmog‘iga noqonuniy ulanib olgani aniqlangan va dalolatnoma tuzilib, gaz quvuridan yana bir bor kesib qo‘yilgan.
Yuzaga kelgan obyektiv murakkab sharoitni to‘g‘ri tushungan holda Albus Cement Group’dan tashqari boshqa yuqoridagi korxonalar muqobil yoqilg‘i (ko‘mir)ga o‘tgan. Shunday bo‘lsa-da, gaz yetkazib berishdagi obyektiv holatdan zavod direktori, boshqaruvchilarning ham to‘liq xabari bo‘lib turib, 6-dekabr kuni zavod ish yurituvchisi A.T. va 20 ga yaqin ishchi zavod faoliyati to‘xtaganligidan noroziligini bildirish uchun oldindan qilingan reja va taklif qilingan uchinchi shaxslar ishtirokida namoyish tashkillashtirilgan.
Ushbu namoyishda xodimlar kelishuvga ko‘ra atayin ehtirosli so‘zlar, chalg‘ituvchi gaplar va keskinlik yordamida, shuningdek, haqiqatga to‘g‘ri kelmaydigan axborotlar orqali o‘z murojaatlarini yetkazgan va videomurojaat oldindan ushbu holatni tasvirga olishga taklif qilingan insonlar ishtirokida Telegram’dagi “Olimjon Haydarov” kanalida e’lon qilingandi.
Avvalroq ham — 2022-yilning iyul oyida Farg‘ona viloyatida faoliyat yurituvchi bloger Olimjon Haydarov 15 sutkaga qamalgani haqida xabar berilgandi. Keyinroq viloyat sudlarining ma’lumot berishicha, u ikki kundan so‘ng jazodan ozod qilingan.
Izoh (0)