«Блогер дегани фақат танқид қилади дегани эмас, пишириқ пиширадиган блогер ҳам бор» — Умид Ғофуров

«Дарё» интернет-нашри Тошкент шаҳри ҳокимлиги қошидаги Жамоатчилик кенгаши билан биргаликда «Маҳалла. Муаммо. Мулоҳаза» лойиҳасини тақдим этиб келмоқда. Лойиҳанинг 10-сони мавзуси «Ахборот воситалари ва давлат органлари муносабати» бўлиб, дастур меҳмони сифатида блогер Умид Ғофуров таклиф этилди.

Дастур меҳмони блогер сўзининг маъносига тўхталиб, у фақат танқид қилувчи инсон эмас, исталган соҳани ёритувчи шахс бўлиш мумкинлигини айтди.

Медиа соҳасида қандай қилиб сифатли, фойдали, савияли контент яратишни ўргатиш ниятим бор. Менга кўпчилик айтади: «Блогер бўлмоқчиман, мен ҳам танқид қилмоқчиман сизга ўхшаб». Йўқ, танқид бу блогинг эмас. Тўғри, менда шунақа бўлиб қолган, ўзим билмаган ҳолда муаммоларни ёритадиган блогерга айланиб қолганман, чиқолмаяпман.

Лекин блогинг ва контент фақатгина муаммолар, танқид, сиёсий мавзулар дегани эмас. Буни кўпчилик, айниқса, ёши катталар тушунмай қолади. Уларга блогер эканингизни айтсангиз, «Менга фалон мавзуни ёритиб бер», дейди. Аслида у шунчаки пишириқ пиширадиган блогер бўлиши мумкин-да, — дея фикрларини изоҳлаган Умид Ғофуров.