“‘O‘zbekiston havo yo‘llari’ kompaniyasini ham isloh qilish vaqti keldi” — Shavkat Mirziyoyev

Prezident Shavkat Mirziyoyev ayni vaqtda Uchtepa tumani faollari bilan yig‘ilish o‘tkazmoqda. Bu haqda “Daryo” muxbiri xabar bermoqda.

Davlat rahbari “O‘zbekiston havo yo‘llari” kompaniyasini isloh qilish kerakligi haqida gapirib o‘tdi.

“Uzoq yillar davomida ko‘plab sohalar qatorida havo yo‘llarimiz bo‘yicha ham samarali ishlay olmadik. Endi esa “O‘zbekiston havo yo‘llari” kompaniyasini ham isloh qilish vaqti keldi. Kompaniya erkin, ochiq va raqobatbardosh bo‘lishi kerak”, — dedi prezident.

Shavkat Mirziyoyev bugungi kunda kompaniyaning aviaparkida 30 ga yaqin samolyot borligini aytdi.

“Samolyotlar sonini oshirish, xizmatlar sifatini yaxshilash, narxlarni arzonlashtirish kerak. Shuningdek, xalqaro yo‘nalishlarda ham raqobatbardosh bo‘lish lozim. Havo yo‘llari xalqimiz kutgandek arzon va xavfsiz aviakompaniya tashkil etiladi”, — deydi Shavkat Mirziyoyev.