Россия қўшинларининг йил охиригача Украинадан олиб чиқиб кетилиши ҳақида «гап ҳам бўлиши мумкинмас», деди Россия президенти матбуот котиби Дмитрий Песков журналистлар билан учрашувда.
«Украина томони шу вақт ичида юзага келган ҳақиқатни қабул қилиши керак. Бу ҳақиқат Россияда янги субъектлар пайдо бўлганини кўрсатади. Улар референдумлар натижасида пайдо бўлди», — деди Песков.
Бундан ташқари, Кремль вакили Украина президенти Владимир Зеленскийнинг Украинада тинчлик ўрнатиш бўйича таклиф қилган учта қадамни «ҳарбий ҳаракатларни давом эттириш учун уч қадам» деб атади.
Россия 24 февралдан бери Украинада «махсус операция» номи билан ҳарбий босқинни давом эттирмоқда. Владимир Путин операция мақсадини Украинани «демилитаризация» ва «денасификация» қилиш, Донбасс аҳолисини ҳимоя қилиш ва ўз хавфсизлигини таъминлаш деб атаган. Июнь ойи охирида Путин «махсус операция»нинг давомийли жанговар ҳаракатлар интенсивлиги ва йўқотишлар хавфи билан боғлиқ бўлишини айтган.
Сентябрь ойида Россия Донбасс республикалари ва Украинанинг босиб олинган Запорожье ва Херсон вилоятларида «референдум» ўтказиб, уларни аннексия қилди. Ташкилотчиларнинг маълум қилишича, ушбу ҳудудлар аҳолисининг гўёки 87—99 фоизи «Россияга қўшилиш»ни қўллаб-қувватлаган. Шундан кейин Украина президенти Владимир Зеленский Қрим, Донбасс, Херсон ва Запорожье вилоятлари мустақиллигини тан олмаслик ҳақида фармон имзолади. У, шунингдек, Қримни қайтариб олиш режалари ҳақида ҳам гапирганди.
12-декрабр куни Зеленский G7 мамлакатлари етакчиларига мурожаатида «Украинада тинчлик ўрнатилишини тезлаштириш» бўйича уч қадамли режасини таклиф қилди. У Киевга янги турдаги қурол-яроғ етказиб беришни, энергетик ва молиявий кўмакни ҳамда Украина томонидан илгари сурилган 10 бандли «тинчлик формуласи»дан иборат бўлган «янги дипломатия»ни ўз ичига олади.
Изоҳ (0)