Germaniya sobiq kansleri Angela Merkelning Minsk kelishuvlaridan asl maqsad haqidagi so‘zlari qo‘rqitmoqda, dedi Avstriya sobiq vitse-kansleri (2017—2019) Xayns-Kristian Shtraxe Ukrainadagi urushga bag‘ishlangan Vena davra suhbatida.
“Germaniya sobiq kansleri Angela Merkel Minsk kelishuvlariga jiddiy qaralmaganini, ular Ukrainaga vaqt berish uchun qabul qilinganini aytdi. Merkel bu haqda qanday ochiq gapirayotgani bizni cho‘chitmoqda. Shu tarzda biz ishonch uchun har qanday asoslarni yo‘q qilyapmiz”, — dedi Shtraxe.
Germaniyaning sobiq kansleri Angela Merkel 7-dekabr kuni Zeit nashriga bergan intervyusida Minsk kelishuvlari “Ukrainaga vaqt berish” uchun kerak bo‘lgani, Kiyev esa bu kelishuvlardan “kuchliroq bo‘lish uchun” foydalanganini aytgandi. Kreml Minsk kelishuvlari “vaqtni cho‘zish” degan fikrga qo‘shilgan. Rossiya prezidenti Vladimir Putin Merkelning so‘zlarini kutilmagan va hafsalani pir qiladigan deb topdi. “Aftidan, hech kim Minsk kelishuvlarining barchasini bajarmoqchi emas”, — dedi u. Ammo Putinning aytishicha, Merkelning so‘zlari Ukrainada “maxsus operatsiya” o‘tkazish to‘g‘risidagi qarorning to‘g‘riligidan dalolat beradi.
Minsk kelishuvlari 2014—2015-yillarda Donbassdagi vaziyatni tartibga solish bo‘yicha Uch tomonlama aloqa guruhi tomonidan qabul qilingan. Uning tarkibiga Rossiya, Ukraina va Yevropa xavfsizlik va hamkorlik tashkiloti vakillari kirgan. Bitimlarni Rossiya, Ukraina, Fransiya prezidentlari va Germaniya kansleri (o‘sha paytda Merkel edi) qo‘llab-quvvatlagan. 2022-yilning oktabr oyida Rossiya sobiq bosh vaziri Sergey Stepashin Merkel Putinni Minsk kelishuvlarini imzolashga “ko‘ndirgan asosiy siyosatchi” bo‘lganini aytdi.
Izoh (0)