Bayden: “AQSH Ukrainaga qo‘shinlar yuborish o‘rniga, unga moddiy yordam taqdim etmoqda”

AQSH Ukrainaga o‘z harbiy xizmatchilarini yubormayapti, lekin unga moddiy yordam ko‘rsatyapti. Bu haqda AQSH prezidenti Jo Bayden aytib o‘tdi, deb yozadi Daily Mail.

“Biz, xuddi avvalgidek, milliardlab dollarlik moddiy vositalarni jo‘natyapmiz”, — deb javob berdi prezident jurnalistlarning savoliga.

Rossiya maxsus operatsiyasi endi boshlangan paytdayoq AQSH ma’muriyati Ukraina hududiga harbiy kontingent yuborilishini istisno qilgan edi.

“Buni yana necha marta takrorlashimni bilmayman, lekin aytamanki, prezident Jo Bayden Amerika qo‘shinlarini Ukrainaga, Rossiyaga qarshi yuboradigan ssenariy mavjud emas”, — degan edi brifingda Oq uy matbuot kotibi Jen Psaki.

Noyabrda ham Bayden AQSH uchinchi jahon urushiga aralashmasligini hamda Rossiya va Ukraina o‘rtasidagi nizoga to‘g‘ridan to‘g‘ri qo‘shilmasligini aytgan edi. Shu bilan birga, prezident Amerika Ukrainaga harbiy ko‘mak taqdim etadi, deb aniqlik kiritgan edi.

Pentagon ma’lumotlariga ko‘ra, 21-noyabr holatiga, AQSH Ukrainaga 20 milliard dollardan ortiq qiymatda harbiy yordam bergan. Shuningdek, Amerika ko‘makni davom ettirishga tayyorligini ma’lum qildi.

10-dekabr kuni Pentagon Ukrainaga 275 million dollarlik navbatdagi yordam paketi haqida e’lon qildi, unga HIMARS baravar o‘t ochish reaktiv tizimlari o‘q-dorilari va 155 millimetrli artilleriya snaryadlari kiradi.

So‘nggi vaqtlarda Ukraina boshqa G‘arb mamlakatlaridan ham qurol-yarog‘ olmoqda. Masalan, noyabr oxirida Buyuk Britaniya unga yuqori aniqlikdagi Brimstone-2 raketalarini bergandi. 8-dekabr kuni Germaniya Ukrainaga 20 ta Dingo bronetransportyorlari va ikkita M1070 Oshkosh katta yukli yarim pritseplarini yuborganini ma’lum qildi.

Rossiya G‘arb tomonidan Ukrainaga qurol yetkazib berilishi, birinchidan, Moskvaga maxsus operatsiya maqsadlariga erishishda xalal bermasligini, ikkinchidan esa, ukrainaliklarga faqat “azob” keltirishini bir necha marta ta’kidlagan.