Vladimir Putinning katta matbuot anjumani Yangi yilgacha o‘tkazilmaydi. Bu haqda Rossiya prezidenti matbuot kotibi Dmitriy Peskov jurnalistlarga ma’lum qildi.
“Katta matbuot anjumaniga kelsak, ha, u Yangi yilgacha bo‘lmaydi. Shu bilan birga, prezident jurnalistlar bilan muloqot qilish uchun imkoniyat topadi, deb o‘ylayapmiz. U buni muntazam ravishda amalga oshirib keladi, shu jumladan, chet el safarlari chog‘ida ham”, — dedi Peskov.
2022-yil oxirigacha prezidentning Federal majlisga murojaati e’lon qilinish-qilinmasligi haqidagi savolga javoban, Kreml vakili shunday dedi: “Murojaat bo‘yicha aniqlashtirishimiz kerak. Murojaat borasida hali tushuntirish beramiz”.
Vladimir Putin katta matbuot anjumanlarini 2001-yildan o‘tkazib keladi, 2012-yildan ular dekabr oyida tashkil qilina boshlagan. Shu paytgacha faqat 2005-yilda prezident an’anaviy matbuot anjumanini o‘tkazmagan. Shuningdek, 2009-yildan 2011-yilgacha, Putin Rossiya bosh vaziri lavozimini egallagan davrda ham bu tadbir tashkil qilinmagan.
Avvalroq Vladimir Putinning yillik katta matbuot anjumani 2022-yilda bo‘lib o‘tmasligi mumkinligi, hozircha uni yil oxirigacha o‘tkazish to‘g‘risida yakuniy qarorga kelinmagani ma’lum bo‘lgandi. “RBK” manbalari yakuniy qaror qabul qilishda “boshqa narsalar qatori maxsus harbiy operatsiya zonasidagi vaziyat ham hisobga olinishini” ta’kidlagandi. Shuningdek, prezidentning Federal Majlisga murojaati qachon bo‘lib o‘tishi aniq emasdi, bunga tayyorgarlik, Peskov avvalroq aytganidek, allaqachon boshlangan.
Izoh (0)