“Katta yettilik” mamlakatlari sammiti ishtirokchilari 12-dekabr kungi sammit yakunida bayonot qabul qilib, Rossiya prezidentining Ukrainaga bostirib kirgani uchun javobgarlikka tortilishiga, Rossiya esa yetkazilgan harbiy zarar uchun tovon to‘lashiga erishishlarini ma’lum qildi.
Britaniya hukumati tomonidan e’lon qilingan yakuniy bayonotda, xususan, quyidagi jumlalar bor:
“Biz to‘la qat’iyat bilan aytishimiz mumkinki, Rossiya oxir-oqibat o‘zining shafqatsiz urushi natijasida zarar ko‘rgan yoki vayron bo‘lgan muhim infratuzilmani qayta tiklash uchun badal to‘laydi. Harbiy jinoyatlar va boshqa vahshiyliklar jazosi qolishi mumkin emas. Biz prezident Putinni va boshqa aybdorlarni xalqaro huquqqa muvofiq javobgarlikka tortamiz”.
“Katta yettilik” mamlakatlari bu yo‘nalishda aynan qanday choralarni ko‘rmoqchi ekaniga bayonotda aniqlik kiritilmagan.
“Katta yettilik” davlatlari, shuningdek, zarurat mavjud bo‘lar ekan, Ukrainani har tomonlama qo‘llab-quvvatlashini yana bir marta ma’lum qildi va urush tugatilishi kerakligini — Rossiya o‘t ochishni to‘xtatib, butun Ukraina hududidan o‘z qo‘shinlarini olib ketishi kerakligini ta’kidladi.
Sammitda Ukraina prezidenti Vladimir Zelenskiy ham qatnashdi. U, xususan, tinchlik o‘rnatilishini tezlashtirish uchun zarur bo‘lgan uchta qadamni taklif qildi.
Izoh (0)