Chernogoriyada prezident Milo Jukanovichning tarafdorlari tomonidan 12-dekabr kuni parlament binosi oldida o‘tkazilgan miting politsiya bilan to‘qnashuvlarga aylanib ketdi.
Namoyishga parlament majlisi sabab bo‘lgan. Unda mamlakat rahbari vakolatlarini cheklovchi yangi qonun loyihasi ma’qullangan.
Podgoritsadagi namoyishchilar parlament binosiga tosh va shishalar otgan, shuningdek, himoya panjarasinini buzishga harakat qilgan. Politsiya tartibsizliklarni bostirish uchun ko‘zni yoshlatuvchi gaz ishlatgan.
“Miting ishtirokchilardan ba’zilari Chernogoriya parlamenti binosi oldida joylashgan himoya panjarasi oldiga yig‘ilib, uning bir qismini buzib tashladi. So‘ng kordondagi politsiyachilarga tosh, shishalar, pirotexnika va boshqa jarohat yetkazuvchi vositalar ota boshladi, shuningdek, zobitlar va parlament tomonga ko‘zdan yoshlatuvchi gaz purkashdi”, — deyiladi politsiya boshqarmasi xabarida.
“Bu jarayonda bir necha politsiya xodimlari va parlament binosiga zarba berildi. Buni sodir etganlar o‘zlarining shaxsini yashirish uchun yuzlariga niqob va boshlariga kapyushon kiyib olgandi. Politsiya rahbariyati ularga zobitlarga qarshi hujumni to‘xtatishni buyurganiga qaramay, ular buni e’tiborga olmadi. Hujumni qaytarish uchun eng yumshoq vosita – qichitadigan qo‘l purkagichidan foydalanish buyurildi”, — deya qo‘shimcha qilingan xabarda.
12-dekabr kuni Chernogoriya parlamenti deputatlari uzoq davom etgan bahs-munozaralardan so‘ng mamlakat prezidenti to‘g‘risidagi qonunga hukumatni shakllantirishda uning vakolatlarini cheklovchi o‘zgartirishlarni ma’qulladi. Avvalroq prezident hukumatni shakllantirishni siyosiy raqibi Miodrag Lekichga topshirishga majbur qiladigan hujjatning dastlabki variantini imzolashdan bosh tortgandi. Noyabr oyida bo‘lgani kabi, bu majlisda ham 81 deputatdan 41 nafari yakuniy qonun loyihasi uchun ovoz berdi, konstitutsiyaga ko‘ra, Jukanovich qonnuni imzolashi kerak.
Izoh (0)