Ўзбекистонда кузатилган электр энергия тақчиллик ва табиий газ етишмовчилиги ҳудудлардаги метан газ заправкаларида турнақатор навбатларга, айрим заправкалар фаолиятининг тўхтатилишига олиб келди. Шундан сўнг ҳайдовчиларда муқобил ёнилғи — бензинга талаб ортди.
Ҳайдовчиларнинг бензинга муҳтожлиги ва аҳолининг транспортга бўлган эҳтиёжидан келиб чиқиб, бу борада президентнинг АИ-80 русумли автобензин маҳсулотини акциз солиғидан озод қилиш бўйича махсус қарори қабул қилинди. Мазкур қарордан келиб чиқиб «Ўзбекнефтгаз»га қарашли бензин заправкаларида АИ-80 маркали бензин нархи 5700 сўмга тушди.
Сир эмаски бензиннинг арзонлашиши нафақат вилоятларда пойтахт Тошкентда ҳам турнақатор навбатлар юзага келишига сабаб бўлди. «Дарё» ижодий жамоаси 13 декабрь куни вилоятларда шу маркадаги бензин қайси нархда сотилаётгани билан қизиқди.
Наманган
«Дарё»нинг Наманган вилоятидаги мухбири Азизбек Абдувалиевнинг маълумот беришича, вилоятдаги «Ўзбекнефтгаз» шохобчаларида АИ-80 маркали бензин 5700 сўмдан сотилмоқда, аммо уларга навбат метан газ қуйиш шохобчаларидаги навбат билан деярли тенглашган.
Хусусий бензин қуйиш шохобчаларида эса бу нарх 7200 сўмни ташкил этмоқда. Уларда ҳам навбат бор, аммо «Ўзбекнефтгаз» шохобчаларидаги каби километрга чўзилмаган. Шунингдек, «Ўзбекнефтгаз» шохобчаларида А-92 маркали бензин 9500 сўмдан, хусусий бензин қуйиш шохобчаларида эса 10500 сўмдан сотилмоқда. Бу маркали бензинга деярли навбат йўқ, — дейди Азизбек Абдувалиев.
Қашқадарё
«Дарё» интернет нашрининг Қашқадарё вилоятидаги вакили Муроджон Амировнинг маълумот беришича, «Ўзбекнефтгаз»нинг вилоятдаги мавжуд 3 та шохобчасида АИ-80 маркали бензин 5700 сўмдан сотилаётган бўлса, хусусий заправкаларда айнан шу маркадаги ёнилғи ҳамон 7000 сўмдан пулланмоқда.
Вилоятнинг Шаҳрисабз туманида «Ишонч» фирмасига қарашли ёнилғи шохобчасида АИ-80 маркали бензин нархи 8000 сўм экани ёзилган. Шохобча сотувчисига бу маркали бензин акциз солиғидан озод қилингани учун нархи тушгани айтилгач, нархни 5700 сўмга туширди. Аммо доимий шу нарх сақланиб қолиши даргумон, — дейди мухбир.
Қўшимча қилинишича, АИ-80 маркали бензин вилоятнинг аксарият туманларида ҳалигача эски нарх — 6800-7000 сўмгача бўлган нархда сотилмоқда.
Фарғона
Таҳририятнинг Фарғона вилоятидаги мухбири Азизжон Эрматовнинг ёзишича, вилоят маркази Фарғона шаҳрида нафақат «Ўзбекнефтгаз»га қарашли заправкаларда, тадбиркорларга қарашли бензин қуйиш шохобчаларида ҳам АИ-80 маркали бензин 5700 сўмдан сотилмоқда.
Тан олиш керак, айрим заправкалар ёпиқ. Заправка эгалари бу маркали бензин йўқ демоқда, — дейди мухбир.
Таъкидланишича, вилоятдаги бензин қуйиш шохобчаларида арзонлаштирилган бензин 5700 сўмдан 7000 сўмгача бўлган нархда сотилмоқда.
Вилоят маркази Фарғона шаҳрида бензин тақчиллиги кузатилмаяпти. Навбатлар деярли йўқ. Шаҳарда бензин нархлари 5700 сўмдан 6600 сўмгача. Туманлардаги нархлар эса 6800 сўмдан 7000 сўмгача. Туманларда айнан АИ-80 бензин етишмовчилиги кузатиляпти. Айрим заправкалар ёпиқ, айримларида АИ-80 йўқ, ўрнига АИ-92 сотиляпти, — дейди Азизжон Эрматов.Андижон
«Дарё»нинг Андижондаги мухбири Умиджон Мамарасуловнинг маълумот беришича, арзонлаган бензин сабаб метан заправкалардаги турнақатор навбат бензин заправкаларига кўчган.
Ҳайдовчилардан бири Васлиддин Қувондиқовнинг айтишича, у бензин заправкада икки соатдан буён навбатда турса-да, ёнилғи ололмаган.
Эрталаб соат тўртда уйдан чиққанман. Беш соат газ заправкада навбат кутдим. Навбатим келай деганда ўчириб қўйишди. Шунча туриб газ қуёлмаганим боис, бензинга келдим. Бу ерда ҳам навбат пайдо бўлибди. Икки соатдан ошди. Шу ердаги арзонидан қуяй деб келсак, бу ерда ҳам одамнинг юзига оёқ қўядиганлар бор экан. Яхшиям қонун посбонлари келиб ёрдам бериб турибди. Бўлмаса на бензин, на газ ололамиз. Тирикчилик қилиб бўлмай қоларди, — дейди у.
Вилоятдаги бензин қуйиш шохобчаларидан бири масъулининг айтишича, бир кунда 8 минг литрдан ортиқ АИ-80 маркали бензин сотилган.
Бугун ҳам Андижондаги «Андижоннефтбаза» МЧЖга қарашли автомобилларга ёнилғи қуйиш шохобчаси доимгидек ўз фаолиятини давом эттиряпти. Туну-кун болалар хизматда. Президентимиз чиқарган қарор билан халққа енгиллик яратиш мақсадида АИ-80 бензини 5700 сўм этиб белгиланди. Кечқурун соат 00:00 дан иш бошлаган бўлсак, шу бўйи ҳозир ҳам савдо тўхтагани йўқ. Ҳозиргача 8 минг литрдан кўп бензин сотилди, — дейди навбатчи оператор Шуҳрат Оҳунов.
Андижон шаҳридаги «Ўзбекнефтегаз»га қарашли иккита ҳамда «Андижоннефтбаза» МЧЖга қарашли автомобилларга бензин қуйиш шохобчаларида АИ-80 маркали бензин 5700 сўмдан сотилаётгани боис АЁҚШда 1 километрдан ортиқ навбатлар юзага келган.
Қўшимча қилинишича, Ош—Тошкент йўлидаги мавжуд хусусий заправкаларда АИ-80 маркали бензин 6800 сўмдан 7500 сўмгача сотилмоқда. Уларнинг айримларида шу маркали бензин мавжуд эмас.
Қорақалпоғистон
2022 йилнинг 13 декабрига ўтар кечаси АИ-80 маркали бензин нархи 5700 сўмга тушгани хабар берилгач, Нукусдаги баъзи шохобчаларда АИ-80 бензини тугаб қолди. Баъзиларида эса бир неча кундан бери шу маркадаги бензин сотилмаяпти, дея хабар берди «Дарё»нинг Қорақалпоғистондаги мухбири Шуҳрат Саидаҳмадов.
Бугун тушликка келиб Нукусдаги саноқли шохобчаларда АИ-80 бензини топиш мумкин бўлмоқда. Нарх эса 7000 сўмлигича қолган. АИ-91, 92 бензинлари эса 12000 мингга чиққан, — дейди нашр мухбири.
«Дарё» мазкур ҳолат юзасидан ўрганишларини давом эттиради.
Изоҳ (0)