AQSH razvedkasi Rossiya o‘q-dorilari tugashi ehtimoli haqida ma’lumot berdi

AQSH Milliy razvedka direktori Evril Xeyns rus harbiylari Ukrainadagi urushda o‘q-dorilarni Rossiya mudofaa sanoati ishlab chiqarayotganiga nisbatan tezroq ishlatayotganini aytdi. Bu haqda NBC News xabar berdi.

“Aniq qiymat haqida ma’lumot bera olmayman. Ammo rus harbiylari urushda o‘q-dorilarni juda tez tugatmoqda, bu juda g‘ayrioddiy. Rossiya hozirgi bosqichda urushda ishlatayotgan o‘qlarni mustaqil ravishda ishlab chiqarishga qodir emasligiga ishonamiz. Demak, bu qiyin vazifa ekanini bildiradi”, — deydi Xeyns.

AQSH razvedkasining fikricha, o‘q-dorilarni sarflashning bunday darajasi Rossiya hukumatini boshqa davlatlar, jumladan Shimoliy Koreya va Erondan harbiy yordam so‘rashga majbur qiladi.

Pentagon noyabr oyida Rossiya qo‘shinlari Ukrainadagi urush paytida kuniga 20 mingtagacha artilleriya o‘qini ishlatgani haqida xabar bergandi.

Evril Xeyns avvalroq Ukrainadagi jangovar harakatlar sur’ati pasayganini ma’lum qilgandi. AQSH razvedkasi Rossiya va Ukraina tomonlari qishdan keyingi qarshi hujumga tayyorgarlik ko‘rish maqsadida zaxiralarni qayta to‘ldirishga intilayotganini ta’kidlagan.