Fransiya prezidenti Emmanuel Makron Ukrainaga qurol yetkazib berishda davom etishini aytib, kesib o‘tilmaydigan ma’lum qizil chiziqlar ham borligini ta’kidladi. Bu haqda Reuters xabar berdi.
Prezidentning so‘zlariga ko‘ra, Kiyevga qurollar yetkazib berish davom etadi, qurollar ishlab chiqarish esa tezlikda amalga oshiriladi. Biroq mamlakat quyidagi ikki “qiziq chiziqqa” rioya qiladi.
“Biz hech qachon o‘z harbiy salohiyatimizni, armiyamizning milliy hududni himoya qilish va askarlarimiz salohiyatini zaiflashtirmaymiz. Hech qachon”, — dedi u.
Makron ikkinchi qizil chiziq Fransiyani Ukrainadagi urushga bevosita jalb etishi mumkin bo‘lgan qurollarni yetkazib berish ekanini aytdi. U Parij bunday qadam qo‘ymasligini ta’kidladi.
Shu bilan birga, Makron Ukrainaga qurol yetkazib berilayotganiga qaramay, mamlakatda qurol taqchilligi kuzatilmayotganini qayd etdi.
“Qurolli kuchlar oliy bosh qo‘mondoni sifatida ishontirib aytamanki, biz har safar qurol yetkazishni, o‘z yerimiz, muhim inshootlarimiz va fuqarolarimiz uchun barcha mudofaa qobiliyatimizni saqlab qolgan holda amalga oshiramiz”, — dedi Fransiya prezidenti.
Ma’lumot o‘rnida, Fransiya Rossiyaning Ukrainadagi “agressiv jinoyatlari”ni tekshirish bo‘yicha maxsus tribunal yaratish ustida ish boshladi. Rossiya Tashqi ishlar vazirligi esa bundan norozilik bildirdi.
Izoh (0)