Eron oliy yetakchisining jiyani va Islomiy Respublikaning ochiq tanqidchisi Faride Moradxaniy mamlakatda davom etayotgan rejimga qarshi namoyishlarni qo‘llab-quvvatladi. Bu haqda Al-Arabia xabar berdi.
U xalqaro hamjamiyatni eronlik namoyishchilarni qo‘llab-quvvatlashga chaqirgan. Faride Moradxaniyning onasi Eronning hozirgi oliy rahbari Ali Xomanaiyning singlisi bo‘ladi. Moradxaniy Islom Respublikasini “qonli va go‘daklarni o‘ldiradigan rejim” deb e‘lon qilgan.
U o‘tgan hafta hibsga olingan, ammo yuqoridagi bayonoti qo‘lga olinishidan bir kun oldin berilgan.
“Barcha erksevar davlatlar ramziy ishora sifatida Erondan o‘z vakillarini chaqirib olishi, mazkur shafqatsiz rejim vakillari va bo‘linmalarini o‘z mamlakatidan chiqarib yuborishi kerak. Shu tariqa Eronning erksevar xalqi bilan birdamliklarini bildirishadi”, — deydi Moradxaniy.
U Birlashgan Millatlar Tashkilotini (BMT) tanqid qilib, quyidagi murojaatni yo‘lladi:
“Bir necha achinish va qisqa, samarasiz bayonotlardan tashqari, jasur eronliklarga qilinayotgan aniq va ochiq zulmga qarshi BMT yana nima qildi?”
Moradxaniyning aytishicha, eronliklar chet el aralashuvini istamaydi va tashqaridan yordamsiz rejimni ag‘darishga qodir. Uning so‘zlariga ko‘ra, xorij hukumatlari rejimning omon qolishiga yordam berishni to'xtatishi kerak.
“Ozod va jasur eronliklar bu zolim rejimni ag‘daradi. Bu rejimni qo'llab-quvvatlamaslik kerak”, — deydi u.
Moradxaniyning akasi o‘tgan hafta Twitter’da rasmiylar uning singlisini chorshanba kuni hibsga olishganini aytdi.
Eronda 22 yoshli kurd ayoli Mahsa Amini hijobni noto‘g‘ri o‘ragani ortidan hibsga olingani va vafot etganidan keyin namoyishlar boshlangandi. Osloda joylashgan Eron Inson huquqlari tashkiloti ma’lumotiga ko‘ra, namoyishlarda kamida 416 kishi, jumladan, 51 bola va 27 nafar ayol xavfsizlik kuchlari tomonidan o‘ldirilgan.
Mavzuga doir:
Izoh (0)