Belarus tashqi ishlar vazirining to‘satdan o‘limi sababi ma’lum qilindi
Belarusning “Nasha Niva” nashri Belarus tashqi ishlar vaziri Vladimir Makeyning to‘satdan vafot etgani bilan bog‘liq ayrim ma’lumotlarni aniqladi.
Nashr ma’lumotiga ko‘ra, 64 yoshli vazirning o‘limiga yurak xuruji sabab bo‘lgan. Siyosatchi 26-noyabr kuni vafot etgan.
“Vladimir Makey yurak xurujiga uchragan paytda Drozdidagi uyida edi. Bizga ma’lum bo‘lishicha, siyosatchi o'z sog‘lig‘idagi o‘zgarishni jiddiy qabul qilmagani uchun vaqtida shifokorga murojaat qilmagan”, deyiladi xabarda.
Ta’kidlanishicha, 27-noyabr, yakshanba kuni Makey rafiqasi, aktrisa Vera Polyakova-Makeyning spektakli uchun teatrga borishni rejalashtirgandi.
Ma’lumot uchun, Vladimir Vladimirovich Makey 1958-yilda Grodno viloyatida tug‘ilgan. 1980-yilda Minsk davlat chet tillar pedagogika institutini, 1993-yilda Avstriya Tashqi ishlar vazirligi Diplomatik akademiyasini tamomlagan. 2012-yil 22-avgustdan beri Vladimir Makey Belarus tashqi ishlar vaziri lavozimida ishlab kelayotgan edi. U favqulodda va muxtor elchi diplomatik darajasiga ega bo‘lgan. Vladimir Makey SHHT sammiti doirasida O‘zbekistonga kelgan va 14-sentabr kuni Vladimir Norov bilan uchrashgan edi.
