Putin yana bir davlatga bostirib kirishga tayyorgarlik ko‘rgan, biroq to‘satdan fikrini o‘zgartirgan — Newsweek

Rossiya 2021-yilning yozida, Ukrainaga bostirib kirishidan bir necha oy oldin Yaponiyaga hujum qilishga tayyorlanayotgan edi. Bu haqda Amerikaning Newsweek nashri xabar berdi.

Nashrga Rossiya xavfsizlik xizmati bilan hamkorlik qiluvchi shaxs tomonidan yozilgan maktub kelib tushgan. Elektron xabar 17-mart sanasi bilan “O‘zgarishlar shamoli” taxallusli agent tomonidan rossiyalik huquq himoyachisi va hozirda Fransiyada surgunda bo‘lgan Vladimir Osechkinga yuborilgan.

Xat Bellingcat razvedka guruhi eksperti Xristo Grozyev tomonidan tahlil qilingan. U maktubni “Rossiya xavfsizlik xizmatiga aloqador (hozirgi yoki sobiq) ikki  kishiga ko‘rsatgan, ular xat “hamkasblari tomonidan yozilganiga shubha qilmasligini” aytgan.

2021-yil avgustida Rossiya “Yaponiya bilan harbiy mojaroga jiddiy tayyorgarlik ko‘rayotgan edi”, deyiladi xatda.

Rossiya xavfsizlik xizmati xodimi buning o‘rniga Rossiya bir necha oydan keyin Ukrainaga bostirib kirishga qaror qilganini qayd etgan.

“Mamlakatlar keskin qarama-qarshilik va hatto urush bosqichiga kirishiga ishonch yuqori edi. Yakunda urush uchun Ukraina tanlandi”, — deb yozadi u.

Manba radioelektron urush vertolyotlarining Yaponiyaga qaratilgan harakatini batafsil tasvirlab bergan, yaponlarni ham Rossiya ommaviy axborot vositalarida “natsistlar” va “fashistlar” deb e’lon qilishga tayyorlanganini aytgan.

Xat egasining ta’kidlashicha, xavfsizlik xizmat go‘yoki “Rossiya jamiyatida Yaponiyaga qarshi axborot kampaniyasini” boshlash vazifasini olgan.

“U yaponlar go'yoki shafqatsiz biologik tajribalarga ixtisoslashgani, g‘ayriinsoniyligi va natsizmga moyil bo‘lganiga qaratilgan edi. Rossiya Yaponiya bo‘yicha rejalarini Ukrainaga almashtirdi. Bu ikkala holatda ham shunchaki aqldan ozish hisoblanadi. Ammo rahbariyatning hujumga bo‘lgan istagi tufayli Rossiya uchun urush muqarrar edi. Oqibatda jangovar tayyor bo‘linmalarning asosiy qismi Ukrainaga ko‘chirildi”, deyiladi maktubda.

Newsweek nashri Rossiya va Yaponiya tashqi ishlar vazirliklariga izoh berishlari uchun murojaat qilgan, ammo hozircha ulardan tegishli javob kelmagan.

Mavzuga doir: Rossiyada boshqaruv yo‘qolib, tartibsizlik yuzaga kelishi mumkin — The Economist