Qirg‘izistonda mamlakat prezidenti Sadir Japarov ishtirokida qurultoy bo‘lib o‘tdi. Prezident rasmiylar endilikda har yili qurultoy oldida hisobot berishini ma’lum qildi. Bu haqda “Mir24” xabar berdi.
Japarovga ko‘ra, 2023-yil mutasaddilar yig‘ilish ishtirokchilari oldida amalga oshirilgan ishlar yuzasidan hisobot beradi va bu har yili amalga oshiriladi.
“Masalan, falon muammoni hal qildik yoki aksincha, hal qilmadik deyishadi. Hisobot shu tartibda bo‘ladi. 2022-yil mening farmonim bo‘yicha qurultoy o‘tkazdik. Umid qilamanki, 2023-yili deputatlar ‘Qurultoy to‘g‘risida’gi qonunni qabul qiladi”, — deydi Sadir Japarov.
Qurultoy qarorida bu taklif Jogorku Keneshga kiritildi. Prezident Vazirlar Mahkamasiga chekka hududlarda aholi bilan ko‘proq ishlash, qirg‘iz xalqining turmush darajasini oshirish bo‘yicha topshiriq berdi.
Qirg‘izistonda 25-26 noyabr kunlari qurultoy — milliy maslahat yig‘ilishi bo‘lib o‘tdi. Unda butun mamlakatdan mingdan ortiq delegatlar ishtirok etdi. Qurultoydan maqsad hokimiyat va respublika aholisi o‘rtasida to‘g‘ridan-to‘g‘ri muloqot o‘rnatishdan iborat.
Qurultoyning ikkinchi kuni delegatlarning nutq so‘zlash vaqti olti daqiqagacha oshirildi. Yig‘ilishning birinchi kunida ishtirokchilar uch daqiqa dolzarb muammolarni aytish uchun yetarli emasligini aytgan. So‘zga chiqqanlarning aksariyati chekka qishloqlarga hokimiyat vakillarining kelmasligi, shu sababli ularning muammolari o‘nlab yillar davomida hal etilmaganini ta’kidladi.
Eslatib o‘tamiz, avvalroq Qirg‘iziston parlamentida tumanlarning rus tilidagi nomini zudlik bilan o‘zgartirish taklif qilingandi. Rossiya Dumasida mazkur taklifga norozilik bildirilgandi.
Izoh (0)