Eronda bank menejeri hijobsiz ayolga xizmat ko‘rsatgani uchun gubernator buyrug‘i bilan egallab turgan lavozimidan chetlashtirildi. Bu haqda Al-Arabia xabar berdi.
Ma’lum qilinishicha, Tehron yaqinidagi Qum provinsiyasida bank menejeri o‘ranmagan ayolga xizmat ko‘rsatgan. Bu esa uning ishdan olinishiga olib kelgan. O‘ranmagan ayol aks etgan tasvirlar ijtimoiy tarmoqlarda ko‘plab reaksiyalarga sabab bo‘lgan.
80 milliondan ortiq aholisi bo‘lgan mamlakatda ayollar soch, bosh va bo‘yinini o‘rashi shart, bu mamlakat axloq politsiyasi tomonidan o‘rnatilgan qonun hisoblandi. Eronda banklarning aksariyati davlat tomonidan nazorat qilinadi. Hukumat rasmiysi hijob qonunini tatbiq etish bunday muassasalar rahbarlarining zimmasida ekanini ta’kidlagan.
Eslatib o‘tamiz, Eronda sentabr o‘rtalarida, 22 yoshli Mahsa Aminiy Tehronda metrodan chiqish chog‘ida hijobni noto‘g‘ri o‘ragani uchun hibsga olingan. Keyinroq Aminiyning akasi politsiyachilar u bilan “qayta tarbiyalash” ishlarini o‘tkazishga va’da berganini aytgan.
Politsiya uchastkasidan qiz tez yordam mashinasida olib ketilgan. Shifokorlar qizda yurak xuruji va insult yuz berganini bildirgan, u bir necha kundan keyin vafot etgan. Eron politsiyasi baxtsiz hodisa yuz berganini da’vo qilmoqda. Mazkur voqeadan so‘ng Eronda namoyishlar boshlangan, ular Aminiyni qo‘llab-quvvatlashlarini bildirgan.
Eron oliy yetakchisi Ali Xomanaiy namoyishlar “oddiy eronliklar” tomonidan o‘tkazilmayotganini, balki oldindan rejalashtirilganini aytgandi, shuningdek, u AQSH va Isroilni tartibsizliklarni tashkillashtirishda ayblagan. Eron hukumati namoyishlarni tartibsizliklar deb nomlagan va ishtirokchilarni hibsga olishni boshlagan. Buning ortidan olti kishi o‘limga hukm qilingan. BMT Eron hukumatini keskin qoralagan.
Izoh (0)