Ekvatorial Gvineya xalqi Teodoro Obiang Ngema Mbasogoni qayta prezident etib sayladi. Bu haqda Reuters xabar berdi.
Siyosatchi qatorasiga oltinchi marta davlat rahbari lavozimini egallaydi. Milliy saylov komissiyasi ma’lumotiga ko‘ra, u saylovda 94,9 foiz ovoz olgan. Saylovda ishtirok etganlar 98 foizini tashkil qilgan. U 1979 yilda Ekvatorial Gvineyada amakisini boshqaruvdan ag‘darib, hokimiyat tepasiga kelgan. 2016 yilda siyosatchi saylovlarda 93,7 foiz ovoz olgan.
Abadiy prezident
Taxminan 1,5 million aholiga ega G‘arbiy Afrika davlati 1968 yilda Ispaniyadan mustaqillikka erishganidan beri bor-yo‘g‘i ikki nafar prezidentga ega bo‘ldi. Obiang 1979 yilda to‘ntarish natijasida amakisi Fransisko Makias Nguemani hokimiyatdan chetlatgan.
43 yildan ortiq hukmronlik qilgan Obiang monarxlarni hisobga olmaganda, dunyodagi eng uzoq vaqt hukmronlik qilgan davlat rahbari hisoblanadi. 80 yoshli siyosat saylovlarda hech qachon 93 foizdan kam ovoz olmagan.
Huquq faollari Ekvatorial Gvineya prezidentini muxolifatni va raqiblarni bostirishda ayblaydi. Mamlakatda namoyishlar taqiqlangan, ommaviy axborot vositalari esa qattiq nazorat ostida. Siyosiy raqiblar ko‘pincha hibsga olinadi va qiynoqqa solinadi, deydi tanqidchilar.
Neft boyligi va korrupsiya
1990-yillarning o‘rtalarida dengizda neftning aniqlanishi Ekvatorial Gvineyani 2021-yilda aholi jon boshiga to‘g‘ri keladigan daromadlar bo‘yicha Sahroi Kabirdan janubiy Afrikaning uchinchi eng boy davlatiga aylantirdi.
Biroq, boylik bir nechta oilalar qo‘lida to‘plangan. Mamlakat, shuningdek, Transparency International tashkilotining 2021 yilgi “Korrupsiyani qabul qilish” indeksida 180 mamlakat ichida 172-o‘rinni egallagan.
Prezidentning o‘g‘li, potensial voris sifatida ko‘rilayotgan vitse-prezident Teodoro Nguema Obiang Mangue 2020-yilda Fransiya sudi tomonidan davlat mablag‘larini o‘g‘irlashda ayblangan.
Izoh (0)