Эрон олий етакчисининг жияни ва Исломий Республиканинг очиқ танқидчиси Фариде Морадханий мамлакатда давом этаётган режимга қарши намойишларни қўллаб-қувватлади. Бу ҳақда Al-Arabia хабар берди.
У халқаро ҳамжамиятни эронлик намойишчиларни қўллаб-қувватлашга чақирган. Фариде Морадханийнинг онаси Эроннинг ҳозирги олий раҳбари Али Хоманаийнинг синглиси бўлади. Морадханий Ислом Республикасини «қонли ва гўдакларни ўлдирадиган режим» деб эълон қилган.
У ўтган ҳафта ҳибсга олинган, аммо юқоридаги баёноти қўлга олинишидан бир кун олдин берилган.
«Барча эрксевар давлатлар рамзий ишора сифатида Эрондан ўз вакилларини чақириб олиши, мазкур шафқатсиз режим вакиллари ва бўлинмаларини ўз мамлакатидан чиқариб юбориши керак. Шу тариқа Эроннинг эрксевар халқи билан бирдамликларини билдиришади», — дейди Морадханий.
У Бирлашган Миллатлар Ташкилотини (БМТ) танқид қилиб, қуйидаги мурожаатни йўллади:
«Бир неча ачиниш ва қисқа, самарасиз баёнотлардан ташқари, жасур эронликларга қилинаётган аниқ ва очиқ зулмга қарши БМТ яна нима қилди?»
Морадханийнинг айтишича, эронликлар чет эл аралашувини истамайди ва ташқаридан ёрдамсиз режимни ағдаришга қодир. Унинг сўзларига кўра, хориж ҳукуматлари режимнинг омон қолишига ёрдам беришни тўхтатиши керак.
«Озод ва жасур эронликлар бу золим режимни ағдаради. Бу режимни қўллаб-қувватламаслик керак», — дейди у.
Морадханийнинг акаси ўтган ҳафта Twitter’да расмийлар унинг синглисини чоршанба куни ҳибсга олишганини айтди.
Эронда 22 ёшли курд аёли Маҳса Амини ҳижобни нотўғри ўрагани ортидан ҳибсга олингани ва вафот этганидан кейин намойишлар бошланганди. Ослода жойлашган Эрон Инсон ҳуқуқлари ташкилоти маълумотига кўра, намойишларда камида 416 киши, жумладан, 51 бола ва 27 нафар аёл хавфсизлик кучлари томонидан ўлдирилган.
Мавзуга доир:
Изоҳ (0)