Buyuk Britaniya Oliy sudi Shotlandiyaning mustaqilligi bo‘yicha yangi referendum o‘tkazilishini rad etdi. Bu haqda Reuters xabar berdi.
Britaniya Oliy sudi qaroriga ko‘ra, Shotlandiya hukumati Britaniya parlamenti ruxsatisiz 2023-yil ikkinchi marta mustaqillik referendumini o‘tkaza olmaydi. Shotlandiya hukumati agar Britaniyadan mustaqillikka erisha olsa, funt sterlingdan voz kechishni rejalashtirayotgani ma’lum qilgandi.
“Shotlandiya parlamenti Shotlandiya mustaqilligi bo‘yicha referendum o‘tkazish uchun qonun qabul qilish huquqiga ega emas”, — deya xulosa qildi sud raisi Robert Rid.
Sud hukmi yarim avtonom Shotlandiya hukumatining 2023-yil oktabr oyida Britaniya tarkibidan chiqish bo‘yicha referendum o‘tkazish istagiga “zarba” bo‘ldi. Shotlandiya bosh vaziri Nikola Sterjen Twitter’da sud qaroriga munosabat bildirdi.
“Buyuk Britaniya parlamentining roziligisiz Shotlandiyaga kelajakni tanlashiga ruxsat bermaydigan qonun Britaniyaning ixtiyoriy sheriklik haqidagi har qanday g‘oyasini afsonaga aylantiradi”, — deydi Nikola Sterjen.
Uning ta’kidlanishicha, Oliy suddagi mag‘lubiyat uning Shotlandiya milliy partiyasi Buyuk Britaniyadagi 2024-yilga mo‘ljallangan navbatdagi saylovni “de-fakto‘ mustaqillik referendumiga aylantirishini anglatadi.
Angliya, Shotlandiya, Uels va Shimoliy Irlandiyani o‘z ichiga olgan Birlashgan Qirollikning 68 millionlik umumiy aholisining taxminan 5,5 millionini shotlandlar tashkil qiladi. 1999-yildan boshlab mamlakat o‘z parlamenti va hukumatiga ega.
Iyun oyida Shotlandiya birinchi vaziri Nikola Sterjen mamlakat mustaqilligi bo‘yicha yangi referendum o‘tkazish niyatida ekanini ma’lum qilgan. Avval ham Sterjen 2023-yilda yana bir mustaqillik referendumini o‘tkazish niyati borligini aytgan, biroq Britaniya bosh vaziri Boris Jonson ikkinchi referendumga yo‘l qo‘ymasligini, chunki Shotlandiya xalqi 2014-yildayoq o‘z istagini bildirganini bir necha bor ta’kidlagan. O‘shanda o‘tkazilgan referendumda shotlandiyaliklarning 55 foizi Britaniya tarkibida qolishni yoqlab, 45 foizi qarshi ovoz bergan edi. Shotlandiyadagi referendum uchun markaziy hokimiyatning roziligi talab qilinadi.
Izoh (0)